İran iqtisadiyyatı SOS siqnalı verir: 1942-ci ildən bəri ən ağır inflyasiya
İranda may ayında istehlak qiymətləri indeksi ötən ilin eyni dövrü ilə müqayisədə 77,2%-ə yüksəlib.
TodayPress TV xəbər verir ki, bu barədə statistik məlumatı ölkənin Mərkəzi Bankına istinadən "Associated Press" (AP) agentliyi yayıb.
Aprel ayı ilə müqayisədə isə göstərici 8,5% artıb. Gündəlik tələbat və ümumi istifadə malları seqmentində, o cümlədən dərman preparatları, taksi xidmətləri, tütün məmulatları və rabitə xidmətlərinin qiymətləri illik müqayisədə 113,8% yüksəlib.
İranda inflyasiya sonuncu dəfə daha yüksək səviyyəyə yalnız 1942-ci ildə çatmışdı. "Bamdad" İqtisadi Araşdırmalar İnstitutunun qeyd etdiyi kimi, hazırkı göstəricilər İkinci Dünya müharibəsindən bəri görünməmiş həddədir.
Bildirilir ki, bu vəziyyətin əsas səbəblərindən biri ABŞ və İsrailin zərbələri nəticəsində İranın biznes sektoruna və neft sənayesinə dəyən böyük zərərdir. Əgər 2015-ci ildə bir ABŞ dolları 32 min riala bərabər idisə, hazırda məzənnə 1,7 milyon rialı ötüb.
