Diametri 330 metr olan asteroid Yerin yaxınlığından keçəcək
Avqustun 10-da Ümumdünya vaxtı ilə saat 00:20-də "2019 NY2" asteroidi Yerin yaxınlığından keçəcək.
TodayPress TV xəbər verir ki, bu barədə "RMF24" nəşri yazıb.
Yerə Yaxın Obyektlərin Öyrənilməsi Mərkəzinin hesablamalarına görə, bu səma cisminin diametri 330 metrə çata bilər.
Obyekt rəsmi olaraq potensial təhlükəli asteroid (PHA) kimi təsnif edilsə də, mütəxəssislər narahatlığa əsas olmadığını bildirirlər. Planetimizlə real toqquşma təhlükəsi yoxdur. Asteroidlər orbitləri Yerə 7,5 milyon kilometrdən daha yaxın məsafədən keçdikdə bu statusu alırlar. Bu dəfə "2019 NY2" Yer kürəsindən təxminən 2,5 milyon kilometr aralıdan keçəcək ki, bu da Yerlə Ay arasındakı orta məsafədən təqribən 6,5 dəfə çoxdur.
Buna baxmayaraq, sözügedən yaxınlaşma obyektin son 150 il ərzində Yerə ən yaxın keçidi olacaq. "2019 NY2" asteroidi Apollon qrupuna aiddir və onun orbital dövrü təxminən 2,3 il təşkil edir.
Bu yaxınlaşmanın NASA-nın ən böyük antenalarının köməyi ilə asteroidin detallı radiolokasiya skanının aparılması üçün unikal imkan yaradacağı gözlənilsə də, texniki məhdudiyyətlər səbəbindən müşahidələr ləğv edilib.
