Ankara ilə İrəvan arasında buzlar əriyir? - Sərdar Kılıç açıqladı
Türkiyə vitse-prezidenti Cevdet Yılmazın İrəvana son səfəri ikitərəfli münasibətlərdə “dönüş nöqtəsi” olub.
TodayPress TV xəbər verir ki, bu barədə Türkiyənin Ermənistanla normallaşma üzrə xüsusi nümayəndəsi, təqaüddə olan səfir Sərdar Kılıç jurnalistlərə bildirib.
O, artan yüksək səviyyəli təmasları və yeni əməkdaşlıq sahələrini vurğulayıb.
Kılıç qeyd edib ki, Yılmaz Ermənistanın Baş naziri Nikol Paşinyanla məhsuldar fikir mübadiləsi aparıb və qədim İpək Yolu üzərində yerləşən tarixi Ani körpüsünün bərpasına dair protokolun imzalanmasında iştirak edib. Müqavilə həm Yılmaz, həm də Paşinyanın iştirakı ilə imzalanıb.
“Təkcə bu fakt Türkiyə-Ermənistan münasibətlərinin nə qədər yol qət etdiyini göstərir. Türkiyənin vitse-prezidenti konfrans üçün İrəvana gəldi, səmimiyyətlə qarşılandı və mühüm görüşlər keçirdi. Bu, əhəmiyyətli bir səfər və dönüş nöqtəsi idi”, - deye nümayəndə bildirib.
O, iki ölkə arasında yüksək səviyyəli təmasların artdığını qeyd edərək, Paşinyanın Türkiyəyə bir neçə dəfə səfər etdiyini və Ermənistan Milli Assambleyasının sədri Alen Simonyanın bu yaxınlarda Ankaraya səfər etdiyini xatırladıb.
S. Kılıç əlavə edib ki, atılmalı çox addım var və prosesin irəliləməsi üçün həmkarı, Ermənistan Milli Assambleyasının sədr müavini Ruben Rubinyanla sıx əməkdaşlıq edir.
Aysel Mətləb
