Kapadokyanın Ortahisar kəndi 2025-ci ildə dünyanın ən gözəl kəndləri siyahısına daxil edildi
Dünyanın ən möhtəşəm təbiət möcüzələrindən biri sayılan, məşhur "peri bacaları" və isti hava şarı turları ilə tanınan Kapadokya yenidən beynəlxalq səviyyədə tanınıb. Regionun mərkəzində yerləşən tarixi Ortahisar kəndi “Forbes” jurnalının açıqladığı 2025-ci il üçün “Dünyanın ən gözəl 50 kəndi” siyahısına düşərək, Kapadokyanın təkcə təbiət gözəlliyi deyil, həm də mədəni əhəmiyyət baxımından bənzərsiz turizm məkanı olduğunu bir daha sübut edib.
TodayPress TV xəbər verir ki, Kapadokyanın ən diqqətçəkən turizm guşələrindən olan Ortahisar hər bir səyyahın görməli məkanlar siyahısında olmağa layiqdir.
Ürgüpdən cəmi 6 kilometr aralıda yerləşən kənd qədim qalası, qaya oyma tikililəri və səmanı bəzəyən rəngarəng şarlar ilə Kapadokyanın özünəməxsus cazibəsini bir araya gətirir.
Ənənəvi memarlığın əbədi cazibəsi
“Forbes” dərgisi Ortahisarı bölgənin vulkanik mənzərəsinə istinad edərək, ərik və kül rəngli səmanın altında Kapadokya torpaqlarından qalxan qədim bir monolit kimi təsvir edir. Milyon illər ərzində yağış və külək Erciyes, Hasandağ və Güllüdağ dağlarının püskürmələri nəticəsində əmələ gəlmiş yumşaq vulkanik qatları oyaraq, bu gün Kapadokyanın simvoluna çevrilən məşhur “peri bacaları”nı formalaşdırıb. Təbiət və zamanın yaratdığı bu unikal landşaft Kapadokyanın möhtəşəm gözəlliyinin əsas nişanəsinə çevrilib.
Kəndin mərkəzində isə Ortahisar qalası yüksəlir. Əslində nəhəng bir “peri bacası” formasında olan bu qala, hələ het dövründə oyulduğu güman edilir. Mağaraları, göyərçin yuvaları və labirintvari tunelləri ilə dünyanın ilk çoxmərtəbəli yaşayış məkanlarından biri sayılır. Bu gün isə Kapadokyanın ən yüksək baxış nöqtələrindən biri kimi, möhtəşəm panoramik mənzərə təqdim edir.
Qalanın ətəyində yerləşən dar daş küçələr boyunca ənənəvi Kapadokya memarlığının nümunələri sıralanır. Küçələrin kənarında ərik satışı ilə məşğul köşklər və qızılgül qoxulu çay bağçaları turistləri valeh edir. Əvvəllər isə ətraf vadilərdə oyulmuş anbarlarda bölgədə yetişdirilən və ya Aralıq dənizindən gətirilən meyvə-tərəvəz – alma, kartof, portağal və limon saxlanılırdı.
Ortahisar həmçinin zəngin dini və mədəni irsi ilə də seçilir. Sarıca, Cambazlı, Tavşanlı kilsələri, Balkan dərəsi kilsələri və Hallaç dərəsi monastırı kimi abidələr Kapadokyanın çoxəsrlik tarixi və dini-mədəni ənənələrini bu günə daşıyır.
Nağıllar diyarı – Kapadokya
Kapadokyanın cazibəsi təkcə Ortahisar kəndi ilə məhdudlaşmır. Bu sehrli bölgə ötən il muzey və arxeoloji məkanlarına 4,37 milyon turist qəbul edərək dünyanın ən çox ziyarət olunan turizm mərkəzlərindən birinə çevrilib. Burada səyahətçiləri yeraltı şəhərlərdən və qaya kilsələrindən başlayaraq, həm möhtəşəm memarlığı, həm də müasir rahatlığı birləşdirən mağara otellərinə qədər unudulmaz təcrübələr gözləyir. Qonaqlar dəbdəbəli mağara otellərində spa xidmətlərindən yararlana, qəribə qaya quruluşları arasında at çaparaq gəzintiyə çıxa və ya saxsı emalatxanalarında öz sənət əsərlərini yarada bilərlər.
Bu təcrübələri isə Kapadokya mətbəxi tamamlayır. Türk və Anadolu kulinariya ənənələrinə əsaslanan yerli təamlar bölgənin özünəməxsus dadını təqdim edir. Məşhur gil qablarında bişirilən, yumşaq ət ilə yerli meyvələrin harmoniyasını birləşdirən yeməklər və tuf torpağından becərilən üzümlərlə hazırlanmış seçmə şərablar burada hər bir naharı unudulmaz edir.
Son illərdə Kapadokya gastronomiya sahəsində də beynəlxalq tanınma qazanıb. Bölgə artıq MICHELIN bələdçisinin Türkiyə xəritəsinə daxil edilib ki, bu da Kapadokyanın təkcə mədəni, həm də kulinariya turizmi üçün dünya səviyyəli bir məkan olduğunu bir daha sübut edir.
FOTOLAR
