26 dəqiqəlik yayımla bağlanan azərbaycandilli kanal: Nə baş verdi?
Dekabrın 7-də Ermənistanda fəaliyyət göstərən azərbaycandilli televiziya cəmi 26 dəqiqəlik təcili canlı yayım edərək fəaliyyətini dayandırdığını elan etdi. Rəsmi səbəblər kimi maliyyə çətinlikləri və siyasi təzyiq göstərildi.
Maraqlıdır, televiziyanın fəaliyyətinin dayandırılmasına əsas səbəb nə oldu?
Məsələ ilə bağlı TodayPress TV-yə danışan Milli Məclisin deputatı Azər Allahverənov bildirib ki, ilk baxışdan Ermənistanda azərbaycandilli televiziyanın fəaliyyət göstərməsi, əslində, onarın mediasında müsbət qarşılanmalı bir addım idi:
"Çünki bu, qarşı tərəfin niyyətinə dair müəyyən təsəvvürlərin formalaşmasına səbəb olar və sülh quruculuğu baxımından pozitiv addım kimi dəyərləndirilə bilərdi. Əgər həmin yayım həqiqətən xoş məqsədlə fəaliyyətə başlamışdısa, bu, eyni zamanda siyasi iradənin mövcudluğundan da xəbər verirdi. Lakin əgər bu platformada separatçı rejimlə bağlı qondarma ifadələr təbliğ olundusa, artıq burada xoş niyyət axtarmaq mümkün deyil. Ola bilər ki, ilkin mərhələdə belə bir niyyət mövcud olub, lakin sonrakı dövrdə siyasi təzyiqlər, cəmiyyətin müəyyən seqmentində gedən proseslər və aktiv qrupların reaksiyası aparıcının qondarma “Artsax” ifadəsini işlətməsinə şərait yaradıb. Kanalın bağlanması da məhz bu təzyiqlərin fonunda baş verib".
Parlamentari bağlanma səbəbi kimi maliyyə məsələsinin göstərilməsini bəhanə adlandırıb:
"Onlar açıq şəkildə etiraf edə bilmirlər ki, cəmiyyətin narazı təbəqəsinin, eləcə də ictimai-siyasi mühitdə təsir gücünə malik qüvvələrin təzyiqləri nəticəsində televiziya fəaliyyətini dayandırıb. Ehtimal etmək olar ki, bu addım cəmiyyətin reaksiyasını ölçmək məqsədi daşıyan bir jest olub. Lakin sonrakı proseslər göstərib ki, cəmiyyət bu cür məsələlərə son dərəcə həssas yanaşır. Hətta xoş niyyətlə yaradılan alətlər belə zamanla müəyyən dairələrin ruporuna çevrilir".
Deputat ümumilikdə baş verənləri sülh prosesinə zidd adlandırıb:
"Azərbaycan Prezidenti İlham Əliyev avqustun 8-də ABŞ-də tərəflər arasında müəyyən sazişlərin imzalanmasından sonra mediaya müsahibəsində xüsusilə vurğuladı ki, Ermənistanın Baş naziri Nikol Paşinyanın qarşısında yerinə yetirilməli ciddi "ev tapşırıqları" var və bu istiqamətdə ardıcıl işlər görülməlidir. O, həmçinin etimad quruculuğunun əhəmiyyətini xüsusi qeyd etdi. Bu gün etimad quruculuğu Ermənistan üçün ən aktual məsələlərdən biridir. Ermənistan cəmiyyətində düşmən obrazı illər və onilliklərlə deyil, hətta XIX əsrin son rübündən etibarən ardıcıl şəkildə formalaşdırılıb. Ölkənin ideologiyası məhz bu məsələlər üzərində qurulub. “Düşmən” deyilən kimi əhalinin zehnində ilk olaraq Azərbaycan canlanır. Bu obrazın dağıdılması üçün ciddi və sistemli işlər görülməlidir".
Azər Allaverənov sonda bildirib ki, sözügedən veriliş müxtəlif siyasi mərkəzlər və dairələrin "düşmən" obrazından hələ də məharətlə istifadə etdiklərini sübüt edib. Onun sözlərinə görə, hətta kanalın sırf Azərbaycan dilində yayım aparması belə onlar üçün qəbuledilməz sayılıb.
Xatırladaq ki, dekabrın 4-də azərbaycanlı jurnalist Vəfa Həmzəyeva Azərbaycan dilində yayımlanan Ermənistan kanalının aparıcısı, jurnalist Diana Karapetyandan müsahibə alıb. Söhbət zamanı Karapetyan Ermənistanda Azərbaycan dilində kanalın yaradılmasındakı əsas missiyanı açıqlayıb.
Bununla yanaşı Karapetyan canlı bağlantı zamanı “Artsax” ifadəsini işlətməyə cəhd edib. Vəfa Həmzəyeva dərhal müdaxilə edərək ona belə bir sual ünvanlayıb:
"Əgər siz hələ də “Artsax“ deyirsinizsə, o zaman sülhdən necə danışmaq olar?"
Azərbaycanlı jurnalist vurğulayıb ki, Ermənistan rəsmi olaraq Qarabağı Azərbaycan ərazisi kimi tanıyıb. Erməni jurnalist bu anda "Bizim üçün “Artsax”, bəziləri üçün “Qarabağ" cümləsini işlədib.
Bu barədə saytımıza açıqlama verən erməni jurnalist Natali Aleksanyan Diana Karapetyanın maliyyələşdirildiyi iddiası ilə çıxış edib.
Qiymət Mahir
