Vaşero Şanxay “Masters”ində rekordu yenilədi
Monakodan olan tennisçi Valanten Vaşero (ATP reytinqində 204-cü yer) Şanxayda keçirilən “Masters” seriyalı turnirdə unikal nailiyyət əldə edib.
TodayPress TV xəbər verir ki, o, yarımfinalda 24 qat “Böyük Dəbilqə” qalibi, serbiyalı Novak Cokoviçi 6:3, 6:4 hesabı ilə məğlub edərək finala yüksəlib.
Birinci setdə hesab 4:3 Vaşeronun xeyrinə olarkən, 38 yaşlı Cokoviç tibbi fasilə götürüb. Serbiyalı tennisçinin hərəkətlərində narahatlıq müşahidə olunub və fizioterapevt ona ayaq masajı edib. Bu səbəbdən oyunda təşəbbüsü əldən verən Novak yekunda 2 setin cəmində Vaşeroya uduzub.
Qeyd edək ki, Vaşero turnirin əsas mərhələsinə seçmə mərhələdən keçərək düşüb. Matç 1 saat 41 dəqiqə davam edib.
26 yaşlı Valanten Vaşero, 1990-cı ildən keçirilən “Masters” turnirləri tarixində ən aşağı reytinqə malik finalçı olub.
Bundan əvvəl belə göstərici rumıniyalı Andrey Pavelə məxsus idi. O, 191-ci raketka kimi “Masters” finalına çıxmışdı. Bu seriyada ən aşağı reytinqli çempion isə xorvatiyalı Borna Çoriç sayılır (152-ci raketka).
Namiq HUN
