Tbilisidə yeni ümidlər: Cüdoçularımızdan medal gözlənilir
Gürcüstanda cüdo üzrə “Böyük Dəbilqə” turniri davam edir.
TodayPress TV xəbər verir ki, bu gün Azərbaycanın daha 4 cüdoçusu Tbilisi turnirinin mükafatları uğrunda mübarizə aparacaq.
Hidayət Heydərov (73 kq) 1/16 finalda turnirdə Belçikanı təmsil edən Zelemxan Batçayevlə qarşılaşacaq. Eyni çəki dərəcəsində mübarizə aparan Kamran Süleymanov isə 1/32 finalda digər belçikalı cüdoçu Rey Marinkslə görüşdə qüvvəsini sınayacaq.
Qadın idmançıların yarışında isə bu gün 70 kq çəki dərəcəsində çıxış edən cüdoçularımızdan Südabə Ağayeva və Aytac Qardaşxanlı tatami üzərinə çıxacaqlar. 1/16 final mərhələsindən mübarizə aparacaq cüdoçularımızın rəqibləri Nino Qulbani (Gürcüstan) ilə Şirincon Yuldoşovay (Özbəkistan) olacaq.
Qeyd edək ki, “Böyük Dəbilqə” turnirinin ilk yarış günündən sonra Azərbaycan komandasının aktivində 1 gümüş medal var. Cüdoçu Turan Bayramov (66 kq) ötən gün fəxri kürsünün ikinci pilləsinə yüksəlib.
Namiq HUN
