NHL-də görünməmiş nəticə: “Pittsburg” tarixə düşdü
“Pittsburg Pinqvinz” klubu ABŞ Milli Hokkey Liqası (NHL) tarixində unikal antirekord müəyyən edib.
TodayPress TV xəbər verir ki, komanda öz meydanında “Yuta Mamont”a 4:5 hesabı ilə (overtaymda) məğlub olub.
Üçüncü periodda “Pittsburg” 3:0 hesabı ilə öndə olmasına baxmayaraq, qələbəni əldən verib.
Bu məğlubiyyət “Pittsburg” üçün ardıcıl ikinci belə oyun olub. Bir gün öncə komanda “San-Xose Şarks”a qarşı matçda da üçüncü periodda üç şaybalıq üstünlüyə malik olduğu halda uduzub.
Nəticədə, “Pittsburg Pinqvinz” NHL tarixində ardıcıl iki oyunda üçüncü periodda üç şayba fərqi ilə öndə olub məğlub olan ilk komanda kimi tarixə düşüb.
Qeyd edək ki, “Pittsburg” üçün bu məğlubiyyət ardıcıl beşincidir.
Namiq HUN
