Mobil telefon kimi top: Mundialın ən maraqlı yeniliyi
2026-cı il futbol üzrə dünya çempionatında ilk dəfə yenilənmiş Connected Ball Technology texnologiyasından tam şəkildə istifadə ediləcək.
TodayPress TV xəbər verir ki, “Ynews”un məlumatına görə, turnirin rəsmi topu olan “Trionda”nın daxilinə xüsusi sensor yerləşdirilib.
Çəkisi cəmi 14 qram olan miniatür sensor real vaxt rejimində topun hərəkəti barədə məlumat toplayır. Sistem saniyədə 500 dəfə məlumat qeydə alaraq topun sürətini, trayektoriyasını, fırlanmasını və futbolçunun ona toxunduğu dəqiq anı müəyyənləşdirir. Toplanan məlumatlar meydanın ətrafında quraşdırılmış 12 yüksək sürətli kameradan əldə olunan görüntülərlə birləşdirilir. Daha sonra süni intellekt baş verənlərin üçölçülü modelini yaradaraq hakimlərə qərar qəbulunda kömək edir.
Texnologiya xüsusilə ofsayd vəziyyətlərinin daha dəqiq müəyyənləşdirilməsi üçün hazırlanıb. Sensor ötürmənin verildiyi anı dəqiqliklə qeydə alır, kameralar isə futbolçuların mövqelərini izləyir. Bunun sayəsində mübahisəli epizodların sayı azalmalı və hakimlərin işi, o cümlədən əl oyunu və qapı xəttini keçən toplarla bağlı qərarların verilməsi sürətlənməlidir.
Qeyd olunur ki, “Trionda” topunun konstruksiyası DÇ-2022-də istifadə olunan “Al Rihla” modeli ilə müqayisədə təkmilləşdirilib. Sensor topun panellərindən birinin daxilində yerləşdirilən xüsusi bölməyə quraşdırılıb, ideal balansın qorunması üçün isə əlavə əks-çəki sistemi tətbiq olunub.
Matçlardan əvvəl topların enerji ilə doldurulması tələb olunacaq. Daxili batareyanın enerji ehtiyatı təxminən altı saat fasiləsiz işləməyə kifayət edir. Oyun zamanı top dəyişdirildikdə isə sistem məlumat itkisi olmadan avtomatik şəkildə yeni topa qoşulur.
Namiq HUN
