Ançelottidən Mourinyonun dönüşünə yaşıl işıq!
Braziliya millisinin baş məşqçisi Karlo Ançelotti portuqaliyalı mütəxəssis Joze Mourinyonun yenidən “Real Madrid” klubuna qayıda biləcəyi ilə bağlı yayılan xəbərlərə münasibət bildirib.
TodayPress TV xəbər verir ki, italiyalı çalışdırıcı Mourinyonun “Real”a dönüş ehtimalını müsbət qiymətləndirib.
“Əgər o, “Real”a qayıtsa, buna səmimi qəlbdən sevinərəm. Mourinyo əvvəllər çalışdığı klublarda gördüyü işi burada da görə bilər. Hazırda Madrid təmsilçisinə yenidənqurma lazımdır. Son illərdə komanda Kazemiro, Toni Kroos, Luka Modriç və Kərim Benzema kimi əsas oyunçularını itirib. Komandadaxili atmosfer çox vacibdir və bunu lider xarakterli futbolçular formalaşdırır. “Real”ın əvvəlki uğurlu atmosferi bərpa etməsi üçün zamana ehtiyacı olacaq”, – deyə Ançelotti bildirib.
Qeyd edək ki, Mourinyo 2010-2013-cü illərdə “Real Madrid”ə rəhbərlik edib. O, “kral klubu” ilə İspaniya çempionluğu, ölkə kuboku və Superkubokunu qazanıb.
Hazırda Joze Mourinyo “Benfika” klubunu çalışdırır. İddialara görə, Portuqaliya təmsilçisi mütəxəssisin “Real”a keçidinə mane olmayacaq.
Namiq HUN
