Kimlərə iki dəfə çox maaş ödəniləcək? — AÇIQLANDI
“Əmək Məcəlləsi”nə təklif edilən dəyişikliklər istirahət, səsvermə, iş günü hesab edilməyən bayram günləri və ümumxalq hüzn günlərində çalışan işçilərin əməkhaqlarının hesablanmasında daha ədalətli mexanizmin tətbiqini nəzərdə tutur. Bu dəyişikliklərə əsasən, həmin günlərdə görülən işə görə əməkhaqqı hesablanarkən artıq təkcə gündəlik deyil, saatlıq tarif maaşı da nəzərə alınacaq".
TodayPress TV xəbər verir ki, bunu deputat Vüqar Bayramov bildirib.
Deputatın sözlərinə görə, Milli Məclisin Əmək və sosial siyasət komitəsində birinci oxunuşda dəstəklənərək plenar iclasa tövsiyə edilən dəyişikliklər əməkhaqqının ödənilməsində ikiqat mexanizmin tətbiqini genişləndirir. O qeyd edib ki, vaxtamuzd əməkhaqqı sistemində bu günlərdə çalışanlara gündəlik və saatlıq tarif maaşının iki misli, işəmuzd sistemində isə ikiqat işəmuzd qiymətləri tətbiq olunacaq.
Vüqar Bayramov bildirib ki, aylıq maaş alan işçilərlə bağlı da yeni yanaşma formalaşdırılır:
“Əgər iş aylıq iş vaxtı norması çərçivəsində görülərsə, maaşdan əlavə gündəlik və saatlıq vəzifə maaşı məbləğindən az olmayacaq. Əgər iş normadan artıq vaxtda yerinə yetirilərsə, bu halda maaşdan əlavə gündəlik və saatlıq vəzifə maaşının ikiqat məbləğindən aşağı olmamaqla ödəniş həyata keçiriləcək”.
Parlamentari vurğulayıb ki, saatlıq vəzifə maaşının “Əmək Məcəlləsi”nə əlavə edilməsi işçilərin əmək hüquqlarının qorunması baxımından mühüm addımdır:
“Bəzi hallarda həmin günlərdə iş tam iş günü deyil, yalnız bir neçə saat davam edir. Yeni dəyişiklik bu cür hallarda hər saata görə əlavə əməkhaqqının ödənilməsinə imkan yaradacaq. Məsələn, əgər işçinin saatlıq tarifi 25 manatdırsa və o, istirahət və ya bayram günündə 3 saat işləyibsə, əvvəlki kimi 75 manat deyil, artıq ən azı 150 manat əməkhaqqı alacaq”.
Vüqar Bayramov əlavə edib ki, Azərbaycanda saatlıq iş rejiminə keçidin müzakirə olunması fonunda bu dəyişikliklər maaş ödənişlərinin beynəlxalq standartlara uyğunlaşdırılması baxımından da xüsusi əhəmiyyət daşıyır:
“Bu yanaşma həm işçilərin sosial rifahını yaxşılaşdıracaq, həm də əmək bazarında daha şəffaf və ədalətli mexanizmlərin formalaşmasına töhfə verəcək”.
Qiymət Mahir
