Gəncədə içməli su təchizatı yaxşılaşdırılır
Azərbaycan Dövlət Su Ehtiyatları Agentliyinin Tikilməkdə Olan Obyektlərin Müdiriyyəti Gəncə şəhərində içməli su və tullantı su təchizatını yaxşılaşdırmaq məqsədilə genişmiqyaslı layihələr həyata keçirir. İşlər Beynəlxalq layihələr çərçivəsində və büdcə vəsaiti hesabına intensiv olaraq davam etdirilir.
TodayPress TV xəbər verir ki, İri Şəhərlərin Birləşmiş Su Təchizatı Xidmətinin mətbuat katibi Ceyhun Musaoğlunun sözlərinə görə, Gəncə şəhərinin içməli su təchizatı 3 mənbədən təmin edilir:
“Şəmkirçay su anbarından götürülən su Sutəmizləyici Qurğular Kompleksində təmizlənərək şəhərə ötürülür. Bununla yanaşı, Göygöl yaxınlığındakı bulaqlar, Gəncəçayın məcrasında olan Qızılqaya su mənbələri də şəhəri içməli su ilə təmin edir”.
Mətbuat katibi onu da vurğulayıb ki, İri Şəhərlərin Birləşmiş Su Təchizatı Xidmətinin Gəncə Sukanal İdarəsi şəhərin içməli və tullantı su təchizatı, yağış sularının idarə olunması xidmətlərini həyata keçirir və 74 min abonentə xidmət göstərir.
“Gəncə şəhərinin su təchizatı və kanalizasiya sisteminin yenidən qurulması” layihəsi çərçivəsində diametri 530 millimetrdən 820 millimetrə qədər müxtəlif ölçülü 58,2 kilometr magistral, diametri 110 millimetrdən 450 millimetrədək 309 kilometr içməli su xətti çəkilib.
21384 su sayğacı quraşdırılıb. Həcmi 21 min kubmetr olan 5 su anbarı tikilib, 6 min kubmetrlik su anbarının tikintisi üzrə isə işlər 50 faiz icra olunub.
Diametri 1600 millimetrə qədər müxtəlif ölçülü 324 kilometr kanalizasiya xətti çəkilərək abonent birləşmələri verilib. Sözügedən işlər beynəlxalq layihənin tələblərinə uyğun aparılıb.
Büdcə vəsaiti hesabına isə diametri 450 millimetrədək 61 kilometr uzunluğunda müxtəlif ölçülü içməli su və 56 kilometr kanalizasiya şəbəkə xətti çəkilərək abonent birləşmələri verilib.
Gəncə şəhər sakinləri görülən işlər barədə razılıqlarını bildirirlər. Şəhər sakini Suliddin Hüseynov intensiv yağışlar zamanı onların yaşadıqları ərazidə əvvəllər su yığıntılarının əmələ gəldiyini, tullantı su şəbəkələrində yüklənmələr olduğunu deyir. O qeyd edir ki, məskunlaşmanın artması magistral kanalizasiya borularının daha böyük diametrli xətlərlə əvəzlənməsi zərurəti yaradırdı: “İndi şükürlər olsun hər şey düzəlir. Əminik ki, işlər bitəndən sonra su təchizatında daha problem yaşamayacağıq”.
Sakin Elşən Ələkbərov da sevincini belə bölüşür: “Yaşadığımız əraziyə yeni su, kanalizasiya xətti çəkildiyinə görə çox sevincliyik. Küçəmiz gözəlləşib, suyu var, asfaltı var. Əziyyət çəkənlərin hamısından razıyıq. Cənab prezidentimiz sağ olsun, Gəncə şəhərinə bu qayğısına, diqqətinə görə”
İstehlakçıların suölçən cihazlarla təmin edilməsi layihəsi çərçivəsində 9396 ədəd sayğac quraşdırılıb. Sayğaclar abonentlərin su sərfiyyatını dəqiq ölçməyə, itkilərin və qeyri-şəffaflıq hallarının qarşısını almağa imkan verir. Layihə həmçinin su təchizatı xidmətlərinin keyfiyyətinin yüksəldilməsinə, istifadəçilərin sərfiyyata uyğun ödəniş etməsinə şərait yaradır.
Müasir tələblərə cavab verən infrastruktur yaradılır. Bu sistemin əsas tərkib hissəsini mərkəzi su anbarları təşkil edir. Hazırda Gəncə şəhərinin içməli su təchizatı 6 mərkəzi su anbarı vasitəsilə həyata keçirilir. Anbarlarda toplanan sular müvafiq qaydada təmizlənmə, dezinfeksiya və nəzarət proseslərindən keçdikdən sonra şəbəkələr vasitəsilə əhalinin istifadəsinə verilir.
Şəhərin bir hissəsinə verilən içməli su dörd min kubmetirlik anbardan ötürülür. C. Musaoğlu bildirib ki, bu anbar Göygöl su mənbəyindən qidalanır və şəhərin əsas su anbarlarından biri hesab olunur: “Mənbədən anbara daxil olan suyun keyfiyyəti yoxlanılaraq siyirtmə kameraları vasitəsilə özüaxımlı rejimdə, yəni elektrik enerjisindən istifadə edilmədən şəhərə ötürülür”.
“Gəncə şəhərinin su təchizatı və kanalizasiya sisteminin yenidən qurulması” layihəsi çərçivəsində həyata keçirilən işlər şəhərin su infrastrukturu üçün mühüm mərhələ təşkil edir. Görülən tədbirlər suyun keyfiyyətinin yüksəldilməsinə, xidmətin dayanıqlığının və etibarlılığının artırılmasına, itkilərin azalmasına, abonent məmnuniyyətinə şərait yaradır.
FOTOLAR
