Ekspert: “Ödənişli atalıq məzuniyyəti münasibətlərdə yeni mərhələ yaradacaq”

Azərbaycanda Əmək Məcəlləsinə təklif edilən dəyişikliklərə əsasən kişilərə uşağın doğulması ilə əlaqədar 14 təqvim günü ödənişli məzuniyyət verilməsi nəzərdə tutulur. Bu yenilik həm sosial siyasət, həm də ailədaxili münasibətlər baxımından mühüm islahat kimi dəyərləndirilir. 

Məsələ ilə bağlı TodayPress TV-yə danışan sosioloq Hüseyn İbrahimov bildirib ki, təklif olunan dəyişiklik həm ailələrin rifahına, həm də gender bərabərliyinə xidmət edən əhəmiyyətli addımdır.

Onun sözlərinə görə, bir çox inkişaf etmiş ölkələrdə atalıq məzuniyyəti artıq uzun illərdir tətbiq olunur və cəmiyyət tərəfindən müsbət qarşılanır. 

"Bu praktika təkcə atanın prosesə cəlb olunması deyil, həm də uşağın psixoloji inkişafı və ailədaxili münasibətlərin sağlam qurulması baxımından vacibdir. Bəzi ölkələrdə atalar üçün məzuniyyət hətta 1 aya qədər uzanır və bu, ailənin ilk günlərdən yükün paylaşılmasına kömək edir. Azərbaycanda da belə bir hüququn verilməsi kişilərin ailə həyatında rolunu artıracaq".

Ekspertin fikrincə, təklif təsdiqlənəcəyi təqdirdə kişilər bu hüquqdan geniş şəkildə istifadə edəcəklər. Çünki ailəyə yeni üzvün gəlməsi həm emosional, həm də məişət baxımından valideynlərin daha çox birlikdə iştirakını tələb edir:

"Kişilər çox vaxt iş rejiminə görə ailəyə lazım olan diqqəti göstərə bilmirlər. Ödənişli atalıq məzuniyyəti onların bu dövrdə aktiv iştirakını təmin edəcək. Hesab edirəm ki, yeni qayda təmin olunsa, bu hüquqdan istifadə edən kişilərin sayı kifayət qədər çoxalacaq".

Sosioloq vurğulayıb ki, atalıq məzuniyyəti həm də gender bərabərliyinin reallaşmasına ciddi töhfə verəcək:

"Çünki indiki sistemdə uşağın doğumundan sonra bütün məsuliyyət əsasən ananın üzərinə düşür. Bu dəyişiklik yükün bölüşdürülməsi baxımından çox önəmlidir. Ana psixoloji və fiziki bərpa dövründə olur. Atanın da evdə olması həm ona dəstəkdir, həm də uşağın ilk günlərində ata bağının yaranmasına imkan verir. Bu yenilik ailə münasibətlərində emosional yaxınlığı artıracaq, valideynlərin birlikdə qərar vermə və problemləri həll etmə bacarıqlarını gücləndirəcək. Ailənin ilk günlərdən birlikdə olması valideynlər arasında daha sağlam kommunikasiya yaradır. Bu, mübahisələrin qarşısının alınmasında, uşağın daha rahat mühitdə böyüməsində mühüm rol oynayır".

Hüseyn İbrahimov hesab edir ki, bu dəyişiklik Azərbaycanın sosial dövlət modelinin daha da gücləndirilməsinə xidmət edir:

"Bu, sırf hüquqi dəyişiklik deyil, həm də dövlətin ailə institutuna verdiyi önəmin göstəricisidir. Hökumət uşağın doğumu kimi həssas bir dövrdə hər iki valideynin də yanında olmasını təşviq edir. Bu, həm sosial rifah, həm də demoqrafik proseslər üçün əhəmiyyətlidir", - deyə o qeyd edib.

Türkan İsgəndərli