Paşinyan Naxçıvana görə ermənini azarladı: "Bura sizin üçün "astanovka" deyil!"
Ermənistanın Baş naziri Nikol Paşinyan ölkə vətəndaşlarını və xüsusilə Qarabağdan köçürülmüş erməniləri Ermənistan Respublikasını daimi vətənləri kimi qəbul etməyə çağırıb. O, keçmişdə iddialı ərazilərə qayıtmaq xülyasından əl çəkilməsini vacib sayıb.
TodayPress TV xəbər verir ki, o, bu barədə Spitak şəhərində Vətəndaş Müqaviləsi Partiyasının seçki kampaniyası çərçivəsində çıxış edərkən deyib.
“Nəticə etibarilə vətən axtarışı prosesinin bitdiyini qəbul etməliyik. Biz vətənimizi tapdıq və bu, Ermənistan Respublikasıdır”,- Paşinyan bildirib.
Baş nazir xəbərdarlıq edib ki, əgər Van, Muş, Qarabağ və Naxçıvana qayıtmaq fikri ermənilərin şüuraltında qalmağa davam etsə, ölkə “dayanacaq” kimi qəbul olunacaq: “Əgər şüuraltımızda daim Vana, Muşa, Qarabağa, Naxçıvana qayıtmalı olduğumuz fikri varsa, o zaman ölkəmizə dayanacaq kimi yanaşmağa başlayırıq”.
Paşinyan bu vəziyyəti səyahət zamanı insanın özünü tam təhlükəsiz və rahat hiss etmədiyi keçici dayanacaqla müqayisə edib. Onun sözlərinə görə, indiki siyasi prosesin məqsədi Ermənistanı “dayanacaq” statusundan çıxarıb, daimi təyinat yeri halına gətirməkdir.
“Biz çatdıq, xalqım”
Paşinyan xüsusilə Qarabağdan köçürülmüş ermənilərə müraciət edərək onları da bu düşüncəni dəyişdirməyə çağırıb: “İndi onlar bura gəliblər və biz istəyirik ki, bu insanlar da bizim kimi məskunlaşsınlar, dayanacaq hissini təyinat yeri hissinə çevirsinlər”.
Baş nazirin bu açıqlaması erməni millətçiliyinin tarixi məğlubiyyətinin rəsmi etirafıdır. 30 il davam edən işğal siyasəti, “dənizdən-dənizə” xülyaları və “böyük Ermənistan” nağılları ardıcıl hərbi məğlubiyyətlərdən sonra faktiki olaraq bitiş nöqtəsinə çatıb. O, indi açıq şəkildə deyir ki, bu xülyaları ağlınızın ucundan belə keçirməyin!..
Jalə Rövşən
