Aİ ölkələrində yeraltı anbarlarda qazın həcmi 75,5%-i ötdü
Avropa İttifaqı ölkələrində yeraltı qaz anbarlarının dolumluluq səviyyəsi 75,5%-i ötüb.
TodayPress TV bu barədə Avropa Qaz İnfrastruktur Operatorları Assosiasiyasına (Gas Infrastructure Europe, GIE) istinadən xəbər verir.
Məlumata görə, Aİ ölkələrində yeraltı qaz anbarlarının dolumluluq səviyyəsi təqribən 75,61% təşkil edir (ötən ilin müvafiq dövründə 91% olub – red.), bu da son beş ilin orta göstəricisindən 7,68 faiz bəndi azdır.
Bildirilib ki, hazırda Aİ ölkələrinin anbarlarında qazın ümumi həcmi 83,1 mlrd. kubmetr təşkil edir.
Qeyd edək ki, Avropa Komissiyasının tələblərinə əsasən, Aİ ölkələri təchizatın pozulması və ya anomal soyuq hava şəraiti zamanı qış dövrünə ehtiyatların artırılmasını təmin etmək üçün hər il noyabrın 1-dək öz qaz anbarlarının 90% dolmasını təmin etməlidir.
Xatırladaq ki, 2020-ci il dekabrın 31-dən Trans-Adriatik boru kəməri (TAP) vasitəsilə Avropaya Azərbaycan qazının nəqlinə başlanılıb.
