Çəkini hər gün ölçmək düzgün deyil

Bədən çəkisinin dəqiq göstəricilərini əldə etmək üçün gündəlik yox, həftəlik və sabit vaxtda ölçmək tövsiyə olunur.

TodayPress TV xəbər verir ki, bu barədə “Wellness Pulse” nəşrinə qlobal qidalanma üzrə ekspertlər məlumat verib.

Onların sözlərinə görə, gündəlik çəki ölçmələri çaşdırıcı ola bilər, çünki bədən çəkisi gün ərzində su balansındakı təbii dəyişikliklər səbəbilə dəyişir.

Gecə saatlarında nəfəsalma və tərləmə yolu ilə orqanizm maye itirir. Bu müddətdə insan nə yeyir, nə də içir, buna görə də səhər çəkisi daha az olur – lakin bu, yağ itkisini əks etdirmir.

“Orqanizmdəki su itkisi və ya yığılması tərəzidəki rəqəmlərə düşündüyümüzdən daha çox təsir edir. Məsələn, maye çatışmazlığı, isti hava və fiziki fəaliyyət çəkidə müvəqqəti azalma yarada bilər. Əksinə, duzlu qidalar, stress, hormonal dəyişikliklər və azhərəkətli həyat tərzi bədəndə suyu saxlayaraq çəkini artırır”, – deyə nəşrdə  bildirilib. 

Mütəxəssislər qeyd edib ki, bu cür qısamüddətli dəyişikliklər yağ kütləsində real dəyişiklik anlamına gəlmir. Ona görə də gündəlik rəqəmlərə çox önəm vermək əvəzinə, uzunmüddətli tendensiyaları izləmək daha məqsədəuyğundur. Ən obyektiv nəticə isə səhərlər, acqarına, eyni tərəzidə və eyni şəraitdə ölçülən çəkidir.

Nəşrə görə, bədən çəkisinin özü orqanizmin vəziyyətini tam əks etdirmir. Buna görə də bel çevrəsi, bel–bud nisbəti və bədəndəki yağ faizi kimi əlavə göstəricilərə də diqqət yetirmək lazımdır, çünki bunlar orqanizmin tərkibi barədə daha dolğun məlumat verir.

Qiymət Mahir