Sloveniya şirkətləri Azərbaycanın neft-qaz sektorunda iştirak edə bilərlər
Sloveniyanın aparıcı enerji şirkətləri Azərbaycanın neft-qaz sektorunda geniş əməkdaşlığa dəvət olunublar.
TodayPress TV xəbər verir ki, bunu energetika naziri Pərviz Şahbazov “X” sosial şəbəkəsindəki hesabında bildirib.
“Lyublyana şəhərində Sloveniyanın ətraf mühit, iqlim və energetika naziri Bojan Kumerin müşayiəti, “Geoplin” şirkətinin icraçı direktoru Simon Urbancl, “Petrol Group” şirkətinin İdarə Heyətinin prezidenti Sašo Berger, “Plinovodi” şirkətinin icraçı direktoru Marjan Eberlinc və “HSE” şirkətinin icraçı direktoru Tomaž Štokeljinin iştirakı ilə #enerji sektorunun müxtəlif istiqamətləri üzrə əməkdaşlığın inkişafına dair səmərəli müzakirələr apardıq. Sloveniyanın aparıcı enerji şirkətlərini Azərbaycanın neft-qaz sektorunda geniş əməkdaşlığa, eləcə də yaşıl enerji layihələrində həm investor, həm də alıcı qismində iştiraka dəvət etdik”, - paylaşımda qeyd olunur.
