Qatar biletləri 150-200 manatdan çox olmamalıdır - AÇIQLAMA
"Təyyarə biletləri çox vaxt 150-200 manat civarında dəyişdiyi üçün qatar ondan xeyli ucuz olsa, daha çox insan istifadə edər".
Bunu TodayPress TV-yə açıqlamasında Liberal İqtisadçılar Mərkəzinin sədri Akif Nəsirli deyib.
Onun sözlərinə görə, hazırda rəsmi qiymət açıqlanmasa da, ilkin müzakirələrdə və ekspert rəylərində biletlərin təxminən 80-100 manat aralığında olacağı deyilir:
"Məncə, normal yataq vaqonu və gecə reysi nəzərə alınsa, 60-80 manat arası daha uyğun görünərdi. Çünki qatar həm rahatlıq, həm də sərhədi problemsiz keçmək baxımından təyyarəyə alternativ olacaq".
Qeyd edək ki, Bakı-Tbilisi qatarının fəaliyyəti 2020-ci ildə pandemiya səbəbindən dayandırılıb. Gürcüstanın Baş naziri İrakli Kobaxidze Bakıda olarkən Azərbaycan tərəfi ilə Bakı-Tbilisi sərnişin qatarının açılması ilə bağlı razılıq əldə olunub. Razılığa əsasən, qatarlar 26 may 2026-cı ildən etibarən işə düşəcək.
Qatarlar hər gün Bakıdan saat 23:10-da yola düşəcək və növbəti gün saat 08:41-də Tbilisiyə çatacaq. Tbilisidən isə qatar saat 21:00-da yola düşərək ertəsi gün saat 06:24-də Bakıya çatacaq.
Məlumata görə, Bakı–Tbilisi–Bakı marşrutu üzrə qatarlara Azərbaycan ərazisində Bakı Dəmiryol Vağzalı, Biləcəri, Yevlax, Gəncə, Ağstafa və Böyük Kəsik stansiyalarında dayanacaq veriləcək. Gürcüstan ərazisində isə qatarlar Qardabani stansiyası və Tbilisi Dəmiryol Vağzalında dayanacaq edəcək.
Azərbaycan Dəmir Yolları QSC-dən bildirilib ki, biletlərin satışa çıxarılması barədə ictimaiyyətə ayrıca məlumat veriləcək.
Türkan İsgəndərli
