Məhərrəm ayının tarixləri ilə bağlı ziddiyyət: Hansı doğrudur?
Məhərrəm ayı iyun ayının 16-sı daxil olacaq, 14 iyulda bitəcək.
Bu barədə TodayPress TV-yə ilahiyyatçı-alim, Qafqaz Müsəlmanları İdarəsinin (QMİ) səlahiyyətlisi Samid Quliyev məlumat verib.
Onun sözlərinə görə, 15 iyulda Səfər ayı daxil olacaq, avqust ayının 3-də İmam Hüseynin (ə) 40-cı günü – Ərbəin mərasimi qeyd olunacaq. 13 avqust tarixində Səfər ayı bitəcək.
"Bu aylar özündə böyük mənəvi dəyərləri, şəhidlik fəlsəfəsini və vətənə bağlılığı ehtiva edir. Kərbəla hadisəsi bizə haqq uğrunda mübarizənin, zülmə boyun əyməməyin və ədalət yolunda canından keçməyin ən ali nümunəsini göstərir.
Şəhidlik anlayışı insanın ən uca zirvəsidir. Vətən, haqq və ədalət naminə canını fəda edənlərin yolu heç vaxt unudulmur. Bu baxımdan, Məhərrəm və Səfər ayları bizə vətənpərvərlik ruhunu daha da dərindən anlamağı, birlik və həmrəylik içində olmağı aşılayır".
İlahiyyatçı əlavə edib ki, bu müqəddəs günlər insanları düşünməyə vadar edir:
"Sual yaranır, biz hansı dəyərlər uğrunda yaşayırıq və lazım gəldikdə nələri qoruya bilərik? İmam Hüseynin (ə) yolu bizə öyrədir ki, haqqın yanında olmaq üçün say çoxluğu deyil, iman və iradə əsasdır. Qoy bu aylar qəlbimizdə mərhəmət, ədalət və vətən sevgisini daha da gücləndirsin, bizi daha düzgün, daha vicdanlı və daha məsuliyyətli insan olmağa sövq etsin".
Qeyd edək ki, mediada Məhərrəmlik ayının iyunun 16-da başlayıb, iyulun 15-də başa çatacağı ilə bağlı informasiya yayılıb.
Türkan İsgəndərli
