Hörmüz dalana dirəndi, Yaponiya Azərbaycana yönəldi
Yaponiya Yaxın Şərqdə gərginliyin artmasından sonra ilk dəfə Azərbaycan nefti idxal edəcək.
TodayPress TV "Reuters"ə istinadən xəbər verir ki, Azərbaycan nefti daşıyan tanker çərşənbə axşamı Yokohama Port limanına çatmalıdır.
Məlumata görə, yük "Eneos" şirkəti üçün nəzərdə tutulub. Yaponiya İqtisadiyyat, Ticarət və Sənaye Nazirliyinin böhranın idarə olunması üzrə baş direktor müavini Narumi Hosokava bildirib ki, bu, Yaxın Şərqdə münaqişə başlayandan sonra Azərbaycandan Yaponiyaya həyata keçirilən ilk neft tədarüküdür.
Qeyd olunub ki, Hörmüz boğazında gəmiçiliklə bağlı yaranan problemlərdən sonra Tokio alternativ enerji mənbələri axtarmağa başlayıb.
Məlumata əsasən, Yaponiya son dövrdə ABŞ-dən neft idxalını artırıb, həmçinin sanksiya istisnası tətbiq olunan "Saxalin-2" layihəsindən də xammal alıb.
Bildirilib ki, Yaponiya hazırda strateji neft ehtiyatlarından da istifadə edir. 8 may tarixinə olan məlumata görə, ölkənin neft ehtiyatları daxili tələbatı 205 gün qarşılamaq imkanına malikdir.
