Bakıda “Alman Birliyi Günü” qeyd olundu
Bu gün Bakıda Almaniyanın Azərbaycandakı səfirliyinin təşkilatçılığı ilə “Alman Birliyi Günü” qeyd olunub.
TodayPress TV xəbər verir ki, tədbirdə Azərbaycan Xarici İşlər Nazirliyinin nümayəndəsi, xarici ölkə səfirləri və ataşelər, diplomatlar, Milli Məclisin deputatları, Azərbaycanda Katolik Kilsəsinin nümayəndələri və digər rəsmi şəxslər iştirak ediblər.
Mərasimin başlanğıcında Azərbaycan və Almaniya dövlət himnləri səsləndirilib.
Ardınca Almaniyanın Azərbaycandakı səfiri Ralf Horlemann çıxış edərək, ölkələrimiz arasındakı əlaqələrin dinamik inkişafından söz açıb və bu əlaqələrin uğurla inkişaf etdiyini deyib.
Sonra isə fəxri qonaq qismində dəvət olunan Azərbaycan Xarici İşlər Nazirliyinin iqtisadi əməkdaşlıq idarəsinin rəisi Elmar Məmmədov çıxış edib.
O, iqtisadi, enerji, humanitar və digər sahələrdə Azərbaycan-Almaniya tərəfdaşlığı çərçivəsində görülən işlərdən danışıb və ikitərəfli münasibətlərin inkişafından məmnunluq ifadə edib.
Tədbir bədii hissə ilə başa çatıb.
Qeyd edək ki, 3 oktyabr 1990-cı ildə Şərqi Almaniya (Almaniya Demokratik Respublikası) rəsmən Qərbi Almaniya (Almaniya Federativ Respublikası) ilə birləşərək vahid Almaniya dövlətini yaradıb.
