Türkiyədən tarixi addım: kürdlər oyundankənar qaldı, türkmanlar masada
Türkiyədən İraqa mal daşıyan yük maşınlarından ibarət ilk tranzit karvan 15 ildən sonra ilk dəfə olaraq Kürdüstan bölgəsini yan keçərək uğurla çatıb.
TodayPress TV xəbər verir ki, bu barədə xarici KİV məlumat yayıb.
Bu, regionda yeni bir mərhələnin başlanğıcı kimi görünür. Karvan ötən həftə yenidən açılan Təl Əbyad sərhəd keçidindən Suriyaya girib, oradan da İraqın Mosul əyalətindəki Rabia istiqamətinə hərəkət edib.
Hadisə Türkiyə-Suriya-İraq dəhlizinin canlandırılması istiqamətində atılan real addımlardan biridir. Yaxın aylarda Nusaybin-Qamışlı marşrutunun da işə düşəcəyi gözlənilir.
Bu marşrut Kürdüstan Regional Hökuməti (KRR) üçün ciddi zərbədir. Son illərdə Bağdadın tətbiq etdiyi yeni gömrük sistemi və ASYCuda platforması səbəbindən İbrahim Xəlil keçidindən keçən Türkiyə-İraq yükdaşımaları təxminən 70% azalıb. İndi isə alternativ yolların açılması KRR-in tranzit gəlirlərini və danışıqlar mövqeyini daha da zəiflədir.
"The National Context" qəzeti ötən ay yazmışdı ki, Ankara və Bağdadın Türkiyə-Suriya-İraq dəmir yolu dəhlizi ilə bağlı açıqlamaları məhz Kürdüstanı kənarda qoyan variantlara işarə edir. Dəmir yolu layihəsi reallaşsa, KRR-in əlindəki üstünlüklər daha da əriyəcək.
Türkiyə bu dəhliz vasitəsilə Avropa və Asiya bazarlarına daha sürətli çıxış əldə etmək istəyir. İraq isə idxal-ixrac yollarını diversifikasiya edərək asılılığı azaltmağa çalışır. Suriya ərazisindən keçən marşrutların açılması həm də regionda sabitliyin yavaş-yavaş bərpa olunduğunu göstərir.
KRR tərəfindən hələlik rəsmi açıqlama verilməyib.
Bağdad-Ankara-Şam arasında güclənən əlaqələr Kürdüstan bölgəsinin İraq daxilindəki mövqeyini yenidən formalaşdırmağa məcbur edəcək. Görünən odur ki, regionda geostrateji kartlar yenidən qarışır.
Jalə Rövşən
