Canavar necə insanın ən yaxın dostuna çevrildi?
Alimlərin araşdırmalarına görə, itlər insanlarla birlikdə təkamül keçirib və minilliklər boyu ayrılmaz tərəfdaşa çevrilib.
TodayPress TV xəbər verir ki, canavarların itə çevrilməsi prosesi 27 min ildən çox əvvəl, Son Buzlaq Maksimumu dövründə başlayıb.
Qida çatışmazlığının hökm sürdüyü bu dövrdə bəzi canavarlar insan məskənlərinə yaxınlaşaraq qida qalıqları ilə qidalanıb. Zamanla insanlar və canavarlar arasında qarşılıqlı faydaya əsaslanan münasibət formalaşıb. Canavarlar insanlara ovda və təhlükəsizlikdə kömək edib, insanlar isə onlara yemək və istilik verib.
Tədqiqatçılar bildirir ki, itlər digər ev heyvanlarından fərqli olaraq insan ehtiyaclarına uyğunlaşmaq baxımından unikal qabiliyyətə malik olub. Bu səbəbdən insanlar yeni ərazilərə köç etdikcə itlər də onlarla birlikdə hərəkət edib. Genetik araşdırmalar son 10 min il ərzində insanların və itlərin birgə miqrasiyasını təsdiqləyir.
Arxeoloji tapıntılar da insanların itlərə xüsusi münasibət bəslədiyini göstərir. Almaniyada tapılan Bonn-Oberkassel adlı ən qədim it skeleti xəstə olduğu halda uzun müddət yaşadığını sübut edir. Alimlər bunu insan qayğısının göstəricisi hesab edirlər.
Dünyanın müxtəlif bölgələrində tapılan it dəfnləri onların sadəcə iş heyvanı deyil, dost və ailə üzvü kimi qəbul edildiyini göstərir. Qədim Misirdə itlər mumiyalanaraq sahibləri ilə birlikdə dəfn edilib, Asiyada isə bəzi it cinsləri müqəddəs hesab olunub.
Mütəxəssislərin fikrincə, insanların uğurunun sirri təkcə gücdə deyil, əməkdaşlıq bacarığındadır. İtlərlə qurulan bu qədim ittifaq da bunu sübut edir: insan dünyanı təkbaşına deyil, ən yaxın dostu ilə birlikdə kəşf edib.
Türkan İsgəndərli
