Həyatın yaşam sığortasına yatırımlar 440 milyon manatı ötdü
2025-ci ilin yanvar-iyul aylarında Azərbaycanda beş həyat sığorta şirkəti vasitəsilə toplanan sığorta yığımlarının həcmi 447 milyon 608 min manata bərabər olub.
TodayPress TV Azərbaycan Mərkəzi Bankına istinadən xəbər verir ki, bu göstəricinin həcmi ötən ilin eyni dövrü ilə müqayisədə 18.4% və ya 69.5 milyon manat çoxdur.
2024-cü ilin yanvar-iyul aylarında həyat sığorta şirkətləri 378 milyon 119 min manat sığorta haqqı toplaya bilmişdi. Bu dövrdə yaşam sığortasının həyat sığortasında bazar payı 94.8% təşkil edib.
Cari ilin ilk 7 ayında həyatın yaşam sığortası üzrə ödənişlər isə 26.6% artaraq 369 milyon 570 min manata çatıb. Ötən ilin ilk 7 ayında bu sığorta növü üzrə ödənişlər 291 milyon 984 min manat təşkil edib.
Qeyd edək ki, həyatın yaşam sığortası yığımları adətən 3-5 illik dövrü əhatə edir. Əmək haqqının bir hissəsini hər ay həyatın yaşam sığortasına yönəldən işçilər müqavilənin sonunda əlavə edilmiş faizlə yanaşı, hər ay ödənilməli olan vergi və sosial sığorta ödənişlərini geri ala bilirlər.
