Azərbaycan Tbilisi Beynəlxalq Kitab Festivalında təmsil olunur

Mayın 29-da Gürcüstanın paytaxtı Tbilisidə XXVII Beynəlxalq Kitab Festivalı başlanıb.

TodayPress TV xəbər verir ki, iyunun 1-dək davam edəcək tədbirdə Azərbaycan Respublikası Mədəniyyət Nazirliyi və Azərbaycan Respublikasının Gürcüstandakı Səfirliyinin təşkilatçılığı ilə ölkəmiz ilk dəfə milli stendlə təmsil olunur. 

Azərbaycan naşir və yazarlarından ibarət heyət kitab bayramında iştirak edir. 

Milli stendimizdə Azərbaycanın tarixi, mədəniyyəti, ədəbiyyatı və müasir inkişafını əks etdirən 83 adda 200-dən artıq nəşr nümayiş olunur.  Gürcüstan Naşirlər və Kitab Satıcıları Assosiasiyası tərəfindən təşkil olunan festivalın ilk günündə Azərbaycanın kitab mədəniyyətinə həsr olunmuş panel müzakirəsi keçirilib. 

Azərbaycan Respublikası mədəniyyət nazirinin müşaviri, yazıçı, kinodramaturq Orxan Fikrətoğlu, yazıçı Sahilə Yaya, yazıçı, dramaturq Sevinc Elsevər və “MİMTA Yayınları” nəşriyyatının təsisçisi Kənan Şabiyevin iştirakı ilə gerçəkləşən müzakirə zamanı Azərbaycan ədəbiyyatının tarixi inkişaf yolu və müasir uğurlarından söz açılıb.

Azərbaycan və gürcü xalqlarının mədəniyyətinin və ortaq tarixinin öyrənilməsində, onların dostluğunun möhkəmlənməsində kitabın və ədəbiyyatın əhəmiyyəti vurğulanıb.

Daha sonra tədbir iştirakçılarının sualları cavablandırılıb. Gürcüstan Yazıçılar Evinin sədri Keti Dumbadze çıxışında Azərbaycanla ortaq ədəbi layihələrin planlaşdırıldığını diqqətə çatdırıb.