Azərbaycan Fotoqrafları Birliyi bəyanat yaydı
Azərbaycan Fotoqrafları Birliyi (AFB) bəyanat yayıb. TodayPress TV xəbər verir ki, bəyanatda deyilir:
"Azərbaycan Fotoqrafları Birliyi (AFB) ictimai, yaradıcılıq və qeyri-kommersiya təşkilatı olub, açıq cəmiyyət, könüllülük və özünüidarə prinsipləri əsasında fəaliyyət göstərir. Birlik Azərbaycan Respublikasının Konstitusiyasına və öz Nizamnaməsinə uyğun olaraq fəaliyyətini həyata keçirir. AFB 20 noyabr 1998-ci il tarixində Azərbaycan Respublikasının Ədliyyə Nazirliyində 1073 nömrəli şəhadətnamə ilə dövlət qeydiyyatına alınıb. Son dövrlər fotoqrafiya ictimaiyyətində və beynəlxalq platformalarda “Azərbaycan Fotoqraflar Federasiyası” adı altında çıxış edən bir qurumla bağlı müxtəlif məlumatlar yayılmaqdadır. Bu məsələ ilə əlaqədar Azərbaycan Fotoqrafları Birliyi olaraq ictimaiyyətə və peşəkar fotoqrafiya mühitinə aydınlıq gətirməyi zəruri hesab edirik.
Azərbaycan Fotoqrafları Birliyi rəsmi qaydada Azərbaycan Respublikasının Ədliyyə Nazirliyinə “Azərbaycan Fotoqraflar Federasiyası” adlı təşkilatın hüquqi statusu ilə bağlı məlumat verilməsi barədə rəsmi qaydada müraciət etmişdir. Nazirliyin rəsmi yazılı cavabına əsasən, bu adda hər hansı bir təşkilat Azərbaycan Respublikasında dövlət qeydiyyatından keçməyib və hüquqi baxımdan mövcud deyil.
Bununla yanaşı, müşahidələr göstərir ki, bəzi şəxslər və qruplar bu adda qurumun nümayəndələri kimi çıxış edir, müxtəlif platformalarda və yazışmalarda ölkəni və Azərbaycan fotoqrafiyasını təmsil etdiklərini bildirirlər. Daha bir narahatedici məqam ondan ibarətdir ki, fotoqrafiya sənətinin inkişafı adı altında ianələrin toplanılması halları da mövcuddur. Hüquqi statusu olmayan bir qurumun adından bu cür fəaliyyət etik və institusional risklər yaradır, eyni zamanda yerli və xarici vətəndaşlar (qurumlar) arasında çaşqınlığa səbəb olur.
Qeyd etmək istərdik ki, bəzi hallarda bu fəaliyyətlər tərəflərindən “Niyyət Məktubu”nun mövcudluğu ilə əsaslandırılır. Bununla bağlı vurğulamaq vacibdir ki, niyyət məktubu hər hansı quruma hüquqi status, təmsilçilik səlahiyyəti və ya rəsmi fəaliyyət hüququ vermir. Hüquqi şəxs kimi tanınma və ictimai fəaliyyət üçün dövlət qeydiyyatı əsas və zəruri şərtdir.
Azərbaycan Fotoqrafları Birliyi bu məsələyə peşəkar məsuliyyət və sahənin sağlam inkişafı baxımından qiymət vermək niyyətindədir. Beynəlxalq əməkdaşlıqda və mədəni sahələrdə şəffaflıq, hüquqi dəqiqlik və doğru təmsilçilik əsas prinsiplərdir. Bu prinsiplərin pozulması isə bütövlükdə Azərbaycan fotoqrafiyasının beynəlxalq nüfuzuna mənfi təsir göstərə bilər.
Bu Bəyanatın məqsədi ictimaiyyəti və beynəlxalq tərəfdaşları məlumatlandırmaq, eyni zamanda fotoqrafiya sahəsində fəaliyyət göstərən qurum və şəxsləri rəsmi statusa, hüquqi əsaslara və doğru məlumatlara diqqət və həssaslıqla yanaşmağa çağırmaqdır.Azərbaycan Fotoqrafları Birliyi ölkədə fotoqrafiyanın inkişafı, peşəkar mühitin formalaşması və beynəlxalq əlaqələrin sağlam əsaslar üzərində qurulması istiqamətində fəaliyyətini davam etdirir və bu sahədə etik davranışın, qanunauyğunluğun və ictimai etimadın qorunmasını vacib hesab edir.
Aşağıda Azərbaycan Fotoqrafları Birliyinin rəsmi müraciətinə cavab olaraq Azərbaycan Respublikasının Ədliyyə Nazirliyindən daxil olmuş məktub təqdim olunur"
FOTOLAR
