Beynəlxalq uçuşlara tələbat artdı
Beynəlxalq sərnişindaşımalara tələbatın (RPK) həcmi oktyabr ayında illik ifadədə 8,5 faiz artıb.
TodayPress TV xəbər verir ki, bu barədə Beynəlxalq Hava Nəqliyyatı Assosiasiyası (IATA) məlumat yayıb.
Qeyd olunur ki, iki rəqəmli artım tempi Asiya-Sakit okean regionunda və Yaxın Şərqdə müşahidə olunub.
“Yüklənmə əmsalı Şimali və Cənubi Amerika istisna olmaqla bütün regionlarda yaxşılaşıb. Asiyada sərnişin axını güclü dinamika göstərib: Çin, Yaponiya və Vyetnama olan və bu ölkələrdən həyata keçirilən daşımalar nəzərəçarpacaq dərəcədə artıb — hər bir istiqamət üzrə illik artım 10 faizi keçib. Yaxın Şərqdəki əhəmiyyətli dinamikanın bir hissəsi ötən ilin aşağı göstəriciləri ilə izah olunur, həmin vaxt regiondakı geosiyasi gərginlik hava daşımalarında fasilələrə səbəb olurdu”, – deyə assosiasiya bildirir.
Regionlar üzrə dinamika isə belə olub: Asiya–Sakit okean regionunda beynəlxalq tələbat 10,9 faiz artıb, tutum isə 9,1 faiz yüksəlib. Yüklənmə əmsalı 84,4 faizə çataraq 1,4 bənd yaxşılaşıb. Avropada tələbat 7,4 faiz artıb, tutum isə 6 faiz yüksəlib, nəticədə yüklənmə əmsalı 86,5 faizə (+1,2 bənd) qalxıb. Şimali Amerikada RPK 4,5 faiz, ASK isə 4,7 faiz artıb, lakin yüklənmə əmsalı 84,2 faizə düşüb (-0,1 bənd). Yaxın Şərqdə tələbat 10,7 faiz, tutum isə 8,1 faiz artıb; yüklənmə 82,5 faizə yüksəlib (+2 bənd).
Latın Amerikasında tələbat 7,2 faiz, ASK isə 8,2 faiz artıb, yüklənmə əmsalı 84,6 faizə enib (-0,8 bənd). Afrikada tələbat 7,3 faiz, tutum isə 5,3 faiz artıb, yüklənmə əmsalı 74,1 faizə çatıb (+1,4 bənd).
