Benzin ixracı sülhə necə töhfə verir? — ŞƏRH
“Azərbaycanın Ermənistana benzin ixracı sırf iqtisadi addım deyil”.
İqtisadçı Eldəniz Əmirov bunu TodayPress TV-yə açıqlamasında deyib.
Onun sözlərinə görə, Azərbaycandan ixrac edilən benzin Ermənistan iqtisadiyyatı üçün mühüm faktora çevrilib və bu proses bazarda mövcud olan inhisarçılığın zəiflədilməsinə təsir göstərib:
“Ən azı, uzun müddət inhisarçılığın hökm sürdüyü bir sahədə antimonopoliya siyasətinin gücləndiyini müşahidə edirik. Bu, Ermənistan iqtisadiyyatı üçün çox önəmli faktordur”.
İqtisadçı vurğulayıb ki, Azərbaycanın bu addımdan əldə etdiyi fayda yalnız iqtisadi göstəricilərlə məhdudlaşmır və prosesin siyasi çəkisi daha ağırdır:
“Burada iqtisadi dividendlərdən daha çox siyasi fayda ön plana çıxır. Azərbaycan sülh gündəliyinə yüksək səviyyədə sadiq qalır, qarşısına qoyduğu öhdəlikləri və qarşı tərəf qarşısında götürdüyü məsuliyyətləri yüksək səviyyədə icra edir. Nəticə etibarilə sülhə doğru daha ciddi və konkret addımlar atılır”.
Eldəniz Əmirov qeyd edib ki, bu yanaşma iki ölkə arasındakı münasibətlərin normallaşdırılması baxımından xüsusi əhəmiyyət daşıyır və prosesi yalnız iqtisadi maraq prizmasından dəyərləndirmək doğru deyil:
“Bu məsələni təkcə benzin ixracı hesabına iqtisadi qazanc əldə etmək kimi qiymətləndirmək olmaz. Azərbaycanın enerji resurslarını idxal etmək istəyən ölkələrin sayı kifayət qədərdir. Eyni zamanda ölkə daxilində də Aİ-95 markalı benzinə ciddi tələbat mövcuddur”.
Sonda iqtisadçı bildirib ki, sözügedən addım iqtisadi alətlərin siyasi proseslərin müsbət istiqamətdə inkişafına xidmət etməsinin bariz nümunəsidir:
“Bu, dövlət səviyyəsində müəyyən edilmiş strategiyanın məqsədyönlü və düzgün icrasıdır. İqtisadi faktorlar siyasi konspektlərin yüksələn xətlə davam etməsinə xidmət edir və bu yanaşma strateji baxımdan düzgün icra edilir”.
Qeyd edək ki, ötən il Azərbaycan Ermənistana 788,8 min ABŞ dolları dəyərində məhsul ixrac edib, Ermənistandan Azərbaycana ixrac isə həyata keçirilməyib.
Belə ki, dekabrın 18-də Azərbaycandan Ermənistana 1 220 ton Aİ-95 markalı avtomobil yanacağı göndərilib.
Bu il isə yanvarın 9-da Ermənistan Azərbaycandan 1 742 ton "Aİ-95" markalı benzin və 956 ton dizel, yanvarın 11-də isə 979 ton "Aİ-92" markalı avtomobil yanacağı idxal edib.
Qiymət Mahir
