Azərbaycan və Özbəkistan vergi sahəsində əməkdaşlığı müzakirə edir

Azərbaycan və Özbəkistanın vergi administrasiyaları arasında əməkdaşlığın mövcud vəziyyəti və inkişaf perspektivləri müzakirə olunub.

TodayPress TV bu barədə İqtisadiyyat Nazirliyi yanında Dövlət Vergi Xidmətinə istinadən xəbər verir.

Məlumata görə, Avropadaxili Vergi Administrasiyaları Təşkilatının (IOTA) Bakıda keçirilən 29-cu Baş Assambleyası çərçivəsində Dövlət Vergi Xidmətinin rəisi Orxan Nəzərli Özbəkistanın Dövlət Vergi Komitəsinin sədri Şerzod Kudbiyevlə görüş keçirib. Görüşdə rəqəmsal texnologiyaların tətbiq edilməsi, vergi inzibatçılığının təkmilləşdirilməsi, vergi ödəyiciləri ilə münasibətlərdə şəffaflığın artırılması sahələrində əməkdaşlığın genişləndirilməsinin vacibliyi vurğulanıb.

O.Nəzərli iki ölkə arasında vergi sahəsində formalaşan əməkdaşlığın müsbət dinamika ilə inkişaf etdiyini vurğulayıb, vergi inzibatçılığının təkmilləşdirilməsi və rəqəmsallaşma istiqamətində həyata keçirilən islahatların qarşılıqlı maraq doğurduğunu, bu sahədə təcrübə mübadiləsinin hər iki tərəf üçün faydalı ola biləcəyini qeyd edib.

Ş.Kudbiyev isə Azərbaycanın son illərdə vergi sahəsində həyata keçirdiyi islahatları təqdir etdiyini bildirib və bu təcrübədən faydalanmaqda maraqlı olduqlarını vurğulayıb.