Səyahətdə hansı qəlyanaltılar daha faydalıdır?
Səyahət zamanı qidalanma gündəlik pəhrizdən kəskin şəkildə fərqlənməməlidir.
TodayPress TV xəbər verir ki, əsas məqsəd zülal, mürəkkəb karbohidratlar, lif və kifayət qədər maye qəbulunu təmin edərək balanslı qidalanmanı qorumaqdır.
Xüsusilə uzun uçuş və ya uzunmüddətli səfərlərdən əvvəl uzun müddət ac qalmaq məsləhət görülmür. Çünki aclıq və yorğunluq insanı şirniyyat, fast food və şəkərli içkilər kimi sürətli enerji verən, lakin qısa müddət sonra yenidən aclıq hissi yaradan qidalara üstünlük verməyə sövq edə bilər.
Qısa səfərlər üçün tez xarab olmayan və hazırlanması tələb edilməyən qidalar daha uyğun hesab olunur. Bunlara şəkər və duz əlavə edilməmiş qoz-fındıq, tam taxıllı çörəklər, bərk qabıqlı meyvələr, rahat daşınan tərəvəzlər, təbii qatıq və saxlama şəraiti uyğun olan digər məhsullar daxildir.
Bununla yanaşı, çoxlu şirniyyat, kartof çipsi, hisə verilmiş və duzlu qidalar səyahət zamanı susuzluğu artıra, ağırlıq hissi yarada və həzm sistemini əlavə yükləyə bilər. Bu xüsusilə təyyarə səfərlərində daha çox hiss olunur, çünki aşağı rütubət və məhdud hərəkətlilik orqanizmin narahatlığını artıra bilər.
Mütəxəssislər səyahət boyunca kifayət qədər su içməyi, uzun müddət ac qalmamağı və mümkün qədər balanslı qidalanmağa üstünlük verməyi tövsiyə edirlər.
Türkan İsgəndərli
