Rusiyanın Ay missiyaları təxirə salındı
Rusiya Elmlər Akademiyasının vitse-prezidenti Sergey Çernışev bildirib ki, “Luna-28”, “Luna-29” və “Luna-30” kosmik aparatlarının buraxılışı 2032–2036-cı illərə təxirə salınıb.
TodayPress TV xəbər verir ki, Rusiyanın Ay proqramı iki mərhələdən ibarətdir.
Birinci mərhələdə eniş zonalarında texnologiyalar sınaqdan keçiriləcək, ikinci mərhələdə isə Ayda infrastrukturun yaradılması və səthdən qalxış imkanları inkişaf etdiriləcək.
Yeni plana əsasən, “Luna-29” 2032-ci ildə, “Luna-30” 2034-cü ildə, “Luna-28” isə 2036-cı ildə buraxılacaq.
Bundan əvvəl Rusiya Elmlər Akademiyasının Kosmik Tədqiqatlar İnstitutunun rəhbəri Lev Zeleny Rusiyanın 2036-cı ilə qədər Aya yeddi pilotsuz aparat göndərməyi planlaşdırdığını açıqlayıb. Proqrama həmçinin “Luna-27a” və “Luna-27b” eniş missiyaları daxildir.
Qeyd olunur ki, “Luna-28” missiyası Ay torpaq nümunələrini toplayaraq onları dəyişməz şəkildə Yerə qaytarmağı hədəfləyir.
Türkan İsgəndərli
