Nadir quşun minlərlə kilometrlik səfəri alimləri təəccübləndirdi
Dünyada yalnız Qalapaqos adalarında məskunlaşan nadir quş - Qalapaqos albatrosu Mərkəzi Amerikadan şimalda ikinci dəfə görüntülənib.
TodayPress TV xəbər verir ki, alimlər Mərkəzi Kaliforniya sahillərində aparılan elmi tədqiqat zamanı Qalapaqos adalarında yuva quran dalğalı albatrosu qeydə alıblar.
Məlumata görə, sarı dimdikli və qara gözlü bu quşun qanad açıqlığı təxminən 2,4 metrə çatır və ömrünün böyük hissəsini okean üzərində uçaraq keçir. Alimləri əsasən təəccübləndirən məqam isə quşun təxminən 4800 kilometr məsafəni qət edərək Qalapaqos adalarından Kaliforniyaya qədər gəlib çıxmasıdır.
Mütəxəssislər bu cür quşları “sərgərdan” kateqoriyasına aid edir, çünki onlar adətən yaşadıqları coğrafi ərazilərdən çox uzaqlara uçurlar. Dalğalı albatros “Point Piedras Blancas” sahillərindən 37 kilometr aralıda, San-Fransisko ilə Los-Ancelesin təxminən ortasında müşahidə olunub.
Dəniz ornitoloqu Tammi Rassel bildirib ki, yetkin quş “cənuba qayıtmağa tələsmir” və ehtimal olunur ki, eyni albatros ötən ilin oktyabr ayında da Şimali Kaliforniya sahillərində görülüb.
Aysel Mətləb
