Balıqlarda bioflüoresensiya 112 milyon il əvvəl yaranıb

Amerika Təbiət Tarixi Muzeyinin mütəxəssisləri tərəfindən aparılan yeni araşdırma, balıqlarda bioflüoresensiya qabiliyyətinin ən azı 112 milyon il əvvəl meydana gəldiyini və bu xüsusiyyətin sonradan 100-dən çox dəfə müstəqil şəkildə inkişaf etdiyini ortaya qoyub.

TodayPress TV xəbər verir ki, tədqiqatın nəticələri “Nature Communications” və “PLOS One” elmi jurnallarında dərc edilib.

Bioflüoresensiya — orqanizmin bir spektrdə işığı udub, onu başqa bir rəngdə şüalanma kimi yayması hadisəsidir. Alimlərin fikrincə, dəniz balıqları arasında bu qabiliyyət daha geniş dalğa uzunluqlarını əhatə edir — yaşıl və sarıdan tutmuş narıncı və qırmızıya qədər.

Tədqiqatda qeyd olunur ki, dəniz canlıları — o cümlədən tısbağalar, mərcanlar və digər orqanizmlər də bioflüoresensiya nümayiş etdirə bilir. Lakin bu fenomenin bioloji funksiyaları və mexanizmləri hələ tam aydın deyil.

Araşdırma zamanı alimlər 459 növ sümük balığının bioflüoresensiya qabiliyyətini analiz ediblər. Bunların arasında 48 növ daha öncə flüoresent hesab olunmurdu. Məlum olub ki, rif ekosistemlərində yaşayan balıqlarda bu qabiliyyətin təkamülü digər növlərlə müqayisədə 10 dəfə daha sürətli baş verib. Ən böyük artım isə təxminən 66 milyon il əvvəlki kütləvi yoxolmadan sonra qeydə alınıb.

Tədqiqatda Son 15 ildə Solomon adaları, Qrenlandiya və Tailandda keçirilmiş ekspedisiyalardan toplanmış muzey nümunələrindən istifadə olunub. Alimlər ultrabənövşəyi və mavi stimullaşdırıcı işıqlarla təchiz olunmuş fotoqrafik qurğu vasitəsilə balıqlarda müxtəlif spektrlərdə işıq yayımını qeydə alıblar. Bəzi balıq ailələrində altı fərqli flüoresensiya zirvəsi müşahidə olunub ki, bu da “işıldayan” dəniz onurğalılarının rəng spektrinin düşündüyümüzdən daha zəngin olduğunu göstərir.

Qiymət Mahir