Rocer Federer milyarder idmançılar siyahısına düşdü

“Forbes” jurnalının açıqlamasına görə, 20 dəfə “Böyük Dəbilqə” qalibi olan İsveçrə tennisçisi Rocer Federerin sərvəti vergilər və agentlik xərcləri çıxılmadan 1,1 milyard dollar olaraq qiymətləndirilib. 

TodayPress TV xəbər verir ki, o, bu gəliri reklam müqavilələri, çıxışlar və müxtəlif kommersiya layihələrindən əldə edib.

“Forbes”in hesablamalarına görə, Federerə məxsus “On” idman geyimləri şirkətindəki payının dəyəri 375 milyon dollardan çoxdur. Tennisçi illər ərzində həmçinin “NetJets” şəxsi təyyarə operatoruna, “Oliver Peoples” eynək brendinə və UBS bankına da investisiya yatırıb.

Nəticədə Federer karyerası ərzində ümumi gəliri 1 milyard dolları üstələyən 7 idmançıdan biri olub. Bu siyahıya basketbolçu Lebron Ceyms, qolfçular Tayger Vuds və Fil Mikelson, futbolçular Kriştianu Ronaldu, Lionel Messi, eləcə də boksçu Floyd Mayvezer daxildir.

Namiq HUN