Madrid nəhəngi seçki qalmaqalına cavab verdi
“Real Madrid” klubu prezidentliyə namizəd Enrike Rikelmenin seçki prosesi ilə bağlı səsləndirdiyi qalmaqallı fikirlərə rəsmi bəyanatla cavab verib.
TodayPress TV xəbər verir ki, bu barədə “kral klubu”nun rəsmi saytı məlumat yayıb.
Bildirilib ki, Rikelme daha əvvəl klub prezidentliyinə seçkilərin şəffaflığına şübhə etdiyini açıqlayıb və prosesi Venesueladakı kommunist diktatura ilə müqayisə edib.
Bununla əlaqədar olaraq “Real”ın Seçki Komissiyası açıqlama yayaraq aşağıdakı məqamlara aydınlıq gətirib:
• Heç bir namizədə klub üzvlərinin siyahısı təqdim edilməyib;
• Hər iki namizədə seçki materiallarının üzvlərə çatdırılması proseduru barədə rəsmi məlumat verilib;
• Namizədlər göndərmək istədikləri sənəd və materialları Seçki Komissiyasına təqdim edir, onların yayılmasını isə klub həyata keçirir;
• Materialların qəbulu üçün son tarix 1 iyun saat 18:00 müəyyənləşdirilib;
• Poçt vasitəsilə göndərilən səslərin təhlükəsizliyi ilə bağlı iddialar əsassız hesab olunub;
• Şəffaflığın artırılması məqsədilə namizədlərə bülletenlərin saxlanıldığı əraziyə müşahidəçi təyin etmək imkanı yaradılıb;
• Bütün seçki prosedurlarının qüvvədə olan qaydalara uyğun həyata keçirildiyi vurğulanıb.
Bəyanatda Seçki Komissiyasının bütün proses boyu qaydalara ciddi şəkildə əməl etdiyi qeyd olunub və seçki prosesinə hörmətlə yanaşmağa çağırış edilib.
Xatırladaq ki, “Real Madrid” klubunda prezident seçkiləri iyunun 7-də keçiriləcək. Seçkilərdə hazırkı prezident Florentino Peres və iş adamı Enrike Rikelme mübarizə aparacaqlar.
Namiq HUN
