“99% inam” – “Barselona” möcüzəyə hazırlaşır
Bu gün, 3 mart tarixində 2025/2026 mövsümü üzrə İspaniya Kubokunun yarımfinal mərhələsinin cavab oyununda “Barselona” ilə “Atletiko Madrid” üz-üzə gələcək.
4:0-dan sonra böyük savaş – gecə kubok həyəcanı!
Bu komandalar arasında İspaniya Kubokunun yarımfinal mərhələsinin ilk görüşü gözlənilmədən Madrid klubunun 4:0 hesablı qələbəsi ilə başa çatıb.
Yeni 6:1 olacaq? “Camp Nou” möcüzə gözləyir!
Lakin katalonların möhtəşəm kambek təcrübəsi var. 8 mart 2017-ci ildə PSJ üzərində 6:1 hesablı qələbə hələ də yaddaşlardadır.
Simeoneyə qarşı hücum planı: erkən qol hər şeyi dəyişə bilər
Hazırda Hans-Diter Flikin komandası ilhamlı günündə istənilən rəqibi çətin vəziyyətə sala bilər. Bununla belə, müdafiədə sabitlik problemi qalır. Dieqo Simeonenin komandası isə əks-hücumlarda çox təhlükəlidir.
“Barsa” erkən qol vuraraq təzyiq yaratmağa çalışmalıdır. Əks halda, açıq futbol “Atletiko” üçün əlavə imkanlar yarada bilər.
“Camp Nou” yeni dram gözləyir – son 5 oyun nə deyir?
Komandaların son beş rəsmi oyunda qarşılıqlı nəticələri:
12 fevral 2026 - İspaniya Kuboku, yarımfinal, ilk oyun
“Atletiko” – “Barselona” 4:0
2 dekabr 2025 - La Liqa, XIX tur
“Barselona” – “Atletiko” 3:1
2 aprel 2025 – İspaniya Kuboku, yarımfinal, cavab oyunu
“Atletiko” – “Barselona” 0:1
16 mart 2025 – La Liqa, XXVIII tur
“Atletiko” – “Barselona” 2:4
25 fevral 2025 – İspaniya Kuboku, yarımfinal, ilk oyun
“Barselona” – “Atletiko” 4:4
“Barselona” klubunun cinah oyunçusu Rafinya İspaniya Kubokunun yarımfinal mərhələsində “Atletiko Madrid” ilə cavab oyunu ərəfəsində azarkeşlərə müraciət edib.
Braziliyalı futbolçu sosial şəbəkə hesabında belə yazıb:
“1% ehtimal – 99% inam. Biz sizə güvənirik.”
Qeyd edək ki, bugünkü görüşdə “Barselona”nın hücumçusu Robert Levandovski zədə səbəbindən komandaya kömək edə bilməyəcək.
Xatırladaq ki, “Barselona” İspaniya Kubokunun son qalibidir. Kataloniya təmsilçisi 26 aprel 2025-ci ildə keçirilən finalda “Real Madrid” klubunu əlavə vaxtda 3:2 hesabı ilə məğlub edərək titulu qazanmışdı.
Namiq HUN
