Abituriyentlərin DİQQƏTİNƏ! Bu il imtahanlar...
“Əvvəlki illərlə müqayisədə builki imtahanlar daha mürəkkəb ola bilər”.
Bunu təhsil eksperti Elmin Nuri TodayPress TV-yə danışarkən bildirib.
Onun sözlərinə görə, 9 və 15 mart tarixlərində keçirilən buraxılış imtahanları vəziyyətin heç də əvvəlki illər kimi sadə olmadığını göstərib:
“2024 və 2025-ci illərdə, eləcə də 2023-cü ildə keçirilən buraxılış imtahanları müəyyən qədər daha sadə tərtib olunmuşdu. Bu isə valideynlərdə, müəllimlərdə, xüsusilə də abituriyentlərin özündə buraxılış imtahanlarının asan olacağı düşüncəsini formalaşdırmışdı. Azərbaycan dili və xarici dil üzrə mütəxəssis olmasam da, bu sahənin peşəkarları ilə müzakirələr apardım. Onların qənaətinə görə, qapalı tipli suallarda ciddi fərq yoxdur, fərq daha çox açıq tipli suallarda hiss olunur. Xüsusilə riyaziyyat fənnində açıq tipli tapşırıqların cavablandırılması vaxt aparır”.
Ekspertin fikrincə, əgər buraxılış imtahanları nisbətən çətin olubsa, blok imtahanlarında sualların sadələşdirilməsi ehtimalı yüksəkdir:
“Qəbul imtahanları iki mərhələdən ibarətdir: buraxılış imtahanları və blok imtahanları. Bu iki mərhələ bir-birini tarazlamalıdır. Bu, sistemdə ciddi xaosun yaranmasının qarşısını almaq üçündür. Əks halda, ciddi qarışıqlıq yarana bilər. Ola bilsin nəticələr gözlənildiyindən yaxşı olsun və narahatlıq əsassız çıxsın”, - deyə o, fikrini tamamlayıb.
Qeyd edək ki, II və III ixtisas qrupları üzrə qəbul imtahanları mayın 24-ü, I və IV qrupları üzrə isə iyunun 7-si keçiriləcək.
Türkan İsgəndərli
