Trampın İran strategiyası: blokada, məhdud zərbələr və iqtisadi təzyiq
ABŞ Prezidenti Donald Trampın İranla bağlı son strategiyasına dair yeni hesabat dərc olunub.
TodayPress TV-nin məlumatına görə, hesabatda bildirilir ki, Vaşinqton əvvəlcə İranın neft sektoruna qarşı dəniz blokadası tətbiq edib. Nəticədə İranın gündəlik neft hasilatının 3,3 milyon barreldən 2,1 milyon barrelə qədər azaldığı qeyd olunur. Eyni zamanda ölkənin gündəlik neft ixracının da 1,8 milyon barreldən 1,2 milyon barrelə qədər gerilədiyi vurğulanır.
Məlumata görə, bu dəyişiklik İranın gündəlik neft gəlirlərinin təxminən 150 milyon dollardan 90 milyon dollara enməsinə səbəb olub.
Hesabat müəlliflərinin fikrincə, Tramp administrasiyası atəşkəs dövrlərindən istifadə edərək İranın asimmetrik dəniz qüvvələrinə qarşı məhdud zərbələr endirməyə üstünlük verib. Bildirilir ki, Vaşinqton bir tərəfdən Tehranla mümkün anlaşmalar barədə açıqlamalar verməklə bazarlarda sabitlik yaratmağa çalışıb, digər tərəfdən isə əlavə vaxt qazanaraq İranın müdafiə imkanlarını zəiflətməyə cəhd göstərib.
Qeyd olunur ki, bu taktika həm ABŞ-də inflyasiya təzyiqlərinin azaldılmasına, həm də Hörmüz boğazında yaranan risklərin iqtisadi təsirlərinin minimuma endirilməsinə hesablanıb.
Bununla belə, hesabatda neft qiymətlərinin hələ də yüksək səviyyədə qalmasının İranın Hörmüz boğazına təsir imkanlarının tam aradan qalxmadığını göstərdiyi vurğulanır.
Təhlildə münaqişənin artıq klassik tükətmə müharibəsi mərhələsinə keçdiyi qeyd edilir. Ekspertlər əsas sualın İran iqtisadiyyatının neft ixracındakı azalmaya nə qədər davam gətirəcəyi və ya enerji qiymətlərinin artmasının ABŞ administrasiyası üçün əlavə siyasi və iqtisadi problemlər yaradıb-yaratmayacağı ətrafında cəmləşdiyini bildirirlər.
