Təyyarənin mühərriki havada alovlandı
"Sun Country Airlines" aviaşirkətinə məxsus "Boeing 737" təyyarəsinin mühərriki ABŞ-yə uçuş zamanı alovlanıb.
TodayPress TV xəbər verir ki, bu barədə "CNN" məlumat yayıb.
Hadisə iyulun 14-də Los-Ancelesdən Minneapolisə gedən reys zamanı baş verib. Təyyarədə 166 nəfər olub.
Sərnişin Rut Sorensen bildirib ki, uçuşun 25-ci dəqiqəsində güclü səs və ildırım çaxmasına bənzər bir partlayış eşidilib. Ardınca mühərrik sönüb və alov çıxıb.
Təyyarə ekipajı fövqəladə vəziyyət elan edərək, hava limanına geri qayıdıb. Təyyarə yanğınsöndürən maşınların müşayiəti ilə uğurla enib.
Sərnişinlər gecəni hava limanında gözləyiblər və səhər saatlarında növbəti reyslə evlərinə yola düşüblər.
Türkan İsgəndərli
