Pakistan əməliyyat keçirdi: 92 silahlı öldürüldü
Pakistan ordusu ölkənin cənub-qərbində yerləşən Bəlucistan əyalətində həyata keçirilən hücumlara görə, məsuliyyət daşıyan azı 92 silahlının öldürüldüyünü açıqlayıb.
TodayPress TV xəbər verir ki, bu barədə "BBC" məlumat yayıb.
Hərbi qurumun məlumatına görə, qarşıdurmalar zamanı 15 təhlükəsizlik xidməti əməkdaşı və 18 mülki şəxs də həlak olub. Ordu hücumlarda silahlılara Hindistanın dəstək verdiyini iddia edib. Dehli isə bu cür ittihamları təkzib edib.
Daha əvvəl Bəlucistan Azadlıq Ordusu (BLA) adlı silahlı qrup hücumlara görə məsuliyyəti öz üzərinə götürərək onlarla əsgərin öldürüldüyünü bəyan edib.
Hər iki tərəfin iddiaları müstəqil mənbələr tərəfindən təsdiqlənməyib.
Pakistan ordusu Bəlucistan boyunca “təmizləmə əməliyyatları” apardığını və üsyançıların “pis niyyətli planlarını uğurla puça çıxardığını” qeyd edib.
Pakistanın baş naziri Şahbaz Şərif ordunu tərifləyərək “terrorçuluq tamamilə məhv edilənədək mübarizənin davam etdiriləcəyini” bəyan edib.
Qeyd edək ki, şənbə günü əl qumbaraları və atıcı silahlarla silahlanmış döyüşçülər əyalət üzrə 12 şəhər və qəsəbədə polis və yarımhərbi obyektləri, həmçinin həbsxana və hökumət binalarını hədəf alıblar.
