Overçuk: "Ermənistanla siyasətimizi yenidən qiymətləndirməliyik"
Ermənistanın Avropa İttifaqı (Aİ) ilə inteqrasiya perspektivləri barədə müstəqil qərar qəbul etmək hüququ var, lakin İrəvanda başa düşməlidirlər ki, bu, Rusiya ilə ticarətdə prinsipial olaraq fərqli tarif rejimi deməkdir.
TodayPress TV xəbər verir ki, bu barədə "TASS"a Rusiya Baş nazirinin müavini Aleksey Overçuk bildirib.
"Əgər belə davam edərsə, qərar qəbul etməli olacağıq. Ermənistana münasibətdə iqtisadi siyasətimizi yenidən qiymətləndirməliyik. Ermənistanın harada olacağına qərar vermək hüququ var. Ancaq onlar da başa düşürlər ki, o zaman onlar üçün tarif rejimi fərqli olacaq, onda ölkələrimiz arasında malların sərbəst hərəkəti olmayacaq və rüsumsuz ticarət olmayacaq", - Overçuk deyib.
O vurğulayıb ki, bu, kifayət qədər ağrılıdır. Belə ki, Ermənistanda, xüsusilə kənd təsərrüfatı sektorunda istehsalçılara zərbə vura bilər: "Bazarın xüsusiyyətləri belədir ki, onların məhsullarına Rusiyada tələbat var. Ətrafdakı bütün ölkələrdə üzüm, ərik və ya digər meyvə və tərəvəz ilə bağlı heç bir problem yoxdur, bunların hamısı var. Görünür, bu amilləri də qiymətləndirməli olacaqlar və qiymətləndirəcəklər".
Rusiya Federasiyası Baş nazirinin müavini onu da qeyd edib ki, Ermənistan Aİ-yə qoşulsa, hazırda Aİ və Rusiya səmasının bir-birinə bağlı olması hava nəqliyyatı sahəsində və transsərhəd yük daşımalarında problemlər yarada bilər. "Bu gün Ermənistanın müttəfiqimiz kimi Rusiyadan aldığı enerji və ərzaq məhsulları üçün başqa qiymətlər olacaq. Ermənistan ən yaxın qonşusu İranla sərbəst ticarət zonasından da üstünlüklərini itirəcək. Nəticələr çox ola bilər, başa düşülməli və qiymətləndirilməlidir. Bu, hər şeydən əvvəl adi insanlar üçün çox pis bir ssenaridir, biz bunu istəmirik və buna görə də bu barədə açıq danışırıq", - Overçuk əlavə edib.
Overçuk onu da qeyd edib ki, Ermənistan Aİ-dən nəsə alacaq, onun üçün yeni bazarlar açılacaq, yeni marşrutlar yaranacaq: "Nəticədə Ermənistan xalqı qərar verəcək. Bu, onların seçimidir".
