NATO 10 min hərbçi ilə təlimə başladı
NATO Almaniyada “Steadfast Dart 26” adlı genişmiqyaslı hərbi təlimə start verib.
TodayPress TV xəbər verir ki, təlimdə NATO-nun 11 üzv ölkəsi - İtaliya, Yunanıstan, Almaniya, Çexiya, İspaniya, Litva, Bolqarıstan, Türkiyə, Fransa, Belçika və Böyük Britaniyadan ümumilikdə 10 min hərbçi iştirak edir. Təlimə quru qoşunları, hava qüvvələri, hərbi dəniz qüvvələri, həmçinin kosmik və kiber bölmələr cəlb olunub. Manevrlərdə 1500-dən çox hərbi nəqliyyat vasitəsi, o cümlədən döyüş tankları və raket buraxılış sistemləri, 20-dən artıq hərbi təyyarə və qırıcı, eləcə də 17 hərbi dəniz vahidi – desant gəmiləri, freqatlar və sualtı qayıqlar istifadə ediləcək.
“Steadfast Dart 26” təliminin əsas məqsədi NATO qüvvələrinin şəxsi heyətinin və texnikasının Alyans ərazisi daxilində qısa müddətdə və koordinasiyalı şəkildə yerləşdirilməsi qabiliyyətini sınaqdan keçirməkdir.
Təlimlərin əsas mərhələləri fevralda Almaniyanın Aşağı Saksoniyada yerləşən Bergen hərbi poliqonunda təşkil olunacaq. Bu ərazi Avropanın ən böyük hərbi təlim poliqonlarından biridir. Bundan əlavə, Şlezviq-Holşteyn vilayətindəki “Putlos” poliqonunda amfibiya desant əməliyyatının nümayişi planlaşdırılır.
“Steadfast Dart 26” təlimi NATO-nun Brunssum şəhərində yerləşən Operativ Qərargahının rəhbərliyi altında yaradılmış yeni sürətli reaksiya qüvvələrinin ilk praktik tətbiqidir.
