Danimarka 9 milyard dollarlıq "HHM" sistemləri alacaq
Danimarka 9,11 milyard ABŞ dolları qiymətində Avropa istehsalı olan hava hücumundan müdafiə sistemləri almağı planlaşdırır.
TodayPress TV xəbər verir ki, bu barədə müdafiə naziri Troels Lund Poulsen təhlükəsizlik sahəsində mürəkkəb vəziyyətə istinad edərək bəyanat verib.
Belə ki, bu, ölkə tarixində ən böyük silah alışı olacaq.
Danimarkanın Baş naziri Mette Frederiksen fevral ayında Avropada mümkün gələcək təcavüzə hazırlıq çərçivəsində hərbçilərə “al, al, al” prinsipi ilə sursat və avadanlıq əldə etmək göstərişi vermişdi.
Danimarka uzaqmənzilli "SAMP/T" platforması və orta mənzilli sistemlər də daxil olmaqla, daha yeni səkkiz sistem alacaq.
“Şübhəsiz ki, təhlükəsizliklə bağlı vəziyyət risk altındadır”, - deyə müdafiə naziri jurnalistlərə açıqlamasında bildirib.
“Rusiyanın bir neçə pilotsuz uçuş aparatı ilə Polşanın hava məkanını pozduğunun şahidi olduq. Bu, hər birimiz üçün döyüş qabiliyyətimizi gücləndirməyin vacibliyini xatırladır”, - deyə o əlavə edib.
