WUF13 çərçivəsində Liderlərin Zirvə Görüşü keçiriləcək
Cenevrədə, BMT-nin Ofisində diplomatik missiya nümayəndələri ilə Ümumdünya Şəhərsalma Forumunun 13-cü sessiyasına həsr olunmuş brifinq keçirilib.
TodayPress TV xəbər verir ki, Azərbaycan Respublikası Dövlət Şəhərsalma və Arxitektura Komitəsinin sədri Anar Quliyev də brifinqdə iştirak edib.
O, bu barədə "X" hesabında paylaşımda qeyd edib.
"Vurğuladıq ki, "WUF13Azerbaijan" hökumətlərin, şəhərlərin, beynəlxalq təşkilatların, özəl sektorun, akademik dairələrin və vətəndaş cəmiyyətinin iştirakı ilə birgə həllərin formalaşdırılması üçün qlobal platforma rolunu oynayacaq. Ümumdünya Şəhərsalma Forumu çərçivəsində tarixində ilk dəfə olaraq Liderlərin Zirvə Görüşü keçiriləcək. Bu isə mənzil və şəhərsalma sahələrinin inkişafı məsələlərinin ən yüksək siyasi səviyyədə liderlik tələb etdiyinə dair mövqeyimizi əks etdirir. Bütün ölkələri və beynəlxalq tərəfdaşları WUF13-də fəal iştirak etməyə dəvət edir, nümayəndə heyətlərini Bakıda qarşılamağı səbirsizliklə gözləyirik", - o bildirib.
