Sahibkarlara kompensasiya ödənilə bilər?
Azərbaycanda elektron siqaretlərin və onların komponentlərinin idxalı, ixracı, istehsalı, saxlanılması, topdan və pərakəndə satışı və istifadəsi qadağan ediləcək.
Bu halda belə bir sual yaranır: qanun qüvvəyə minməzdən əvvəl həmin məhsulların satışı ilə məşğul olan və hazırda mağazalarında satılmamış mal ehtiyatı qalan sahibkarların aqibəti necə olacaq?
Bu barədə TodayPress TV-yə danışan iqtisadçı Akif Nəsirli bildirib ki, qanun qüvvəyə minməzdən əvvəl elektron siqaretlərin satışı ilə məşğul olmuş və mağazalarında mal qalmış sahibkarlar üçün xüsusi keçid müddəti, dövlət tərəfindən geri alınma mexanizmi və ya kompensasiya nəzərdə tutulmayıb:
"Yəni qanunda açıq şəkildə "qanundan əvvəl idxal edilmiş və satılmamış mallara görə kompensasiya ödənilir" kimi müddəa yoxdur. Bu qadağalar mülkiyyətin müsadirəsi deyil, sahibkarlıq fəaliyyətinin tənzimlənməsi kimi qiymətləndirilir. Dövlət malları birbaşa sahibkardan almadığı və ya müsadirə etmədiyi halda, kompensasiya öhdəliyi yaranmır. Qanun qüvvəyə mindikdən sonra isə bu məhsulların saxlanılması və satışı hüquqi risk yaradacaq".
Akif Nəsirli əlavə edib ki, mövcud qanun layihəsinə əsasən, qanundan əvvəl idxal edilmiş elektron siqaretlərə görə sahibkarlara kompensasiya ödənilməsi nəzərdə tutulmur. Bu yalnız qanuna ayrıca dəyişiklik edildiyi və ya xüsusi keçid-kompensasiya mexanizmi əlavə olunduğu halda mümkün ola bilər.
Qeyd edək ki, qanun layihəsi 2026-cı il 1 fevral tarixindən qüvvəyə minəcək və bu tarixədək məhsulların dövriyyəsi qanuni sayılır.
Türkan İsgəndərli
