Ramin Məmmədov Astarada dini ibadətgahların fəaliyyəti ilə tanış oldu

Dini Qurumlarla İş üzrə Dövlət Komitəsinin sədri Ramin Məmmədov Astara rayonu Ərçivan qəsəbəsində "Məhəmməd Hənəfiyyə” və Vəznəş kənd məscidlərini ziyarət edib. 

TodayPress TV xəbər verib ki, məscidlərdə fəaliyyət göstərən din xadimləri ilə görüş zamanı komitə sədri multikultural dəyərlərin qorunması, eyni zamanda tolerantlıq mühitinin, milli-mənəvi dəyərlərə bağlılığın gücləndirilməsinin dövlətin diqqət mərkəzində olduğunu vurğulayıb. 

Qeyd edib ki, Prezident İlham Əliyevin siyasəti ölkədə dövlət-din münasibətlərinin ən yüksək səviyyədə tənzimlənməsini təmin edir. Azərbaycan dünyada nadir ölkələrdəndir ki, burada bütün dinlərə hörmətlə yanaşılır, bərabər münasibət göstərilir.

Ölkədə müxtəlif dinlərə aid ibadət yerlərinin tikintisi, təmir edilməsi və bərpası, mütəmadi olaraq dini qurumlara maddi yardım ayrılması dövlətin dini dəyərlərə həssas münasibətini əks etdirir. 

Görüşlərdə, həmçinin dini radikalizmlə mübarizə, dini maarifləndirmə tədbirlərinin davam etdirilməsi və dövlət-din münasibətlərinin inkişafı istiqamətində qarşıda duran vəzifələr müzakirə edilib.

Dini icmaların fəaliyyətinin şəffaf və qanunvericiliyə uyğun şəkildə təşkil edilməsinin vacibliyi vurğulanıb.

Dövlət komitəsinin sədri din xadimlərini vətəndaş birliyinin möhkəmləndirilməsində mühüm rol oynadığını bildirib, onları gənclərin milli-mənəvi ruhda tərbiyəsində fəal olmağa çağırıb. 

Din xadimləri dövlət tərəfindən onlara göstərilən qayğını yüksək dəyərləndirdiklərini qeyd edərək dini dəyərlərin qorunmasına həssas münasibətdən məmnunluqlarını ifadə ediblər.