Azərbaycanlı kişilər aliment ödəməkdən buna görə yayınır - AÇIQLAMA
Azərbaycanda aliment ödənişləri ilə bağlı problemlər son illər daha qabarıq şəkildə özünü göstərir. 2025-ci ildə 6 300-dək iş üzrə aliment ödənişi həyata keçirilməyib, ötən il icraatda olan 142 minə yaxın aliment işindən təxminən 47 minində isə ödənişlər gecikmə ilə yerinə yetirilib.
Maraqlıdır, bu nə ilə bağlıdır? Azərbaycanda kişilər niyə aliment ödəməkdən yayınırlar?
"Alimentdən yayınma hallarına daha çox mübahisəli ailələrdə və 40–45 yaşlı bəzi kişilər arasında görülür".
Bunu TodayPress TV-yə psixoloq Sevinc Həbibova deyib.
Onun sözlərinə görə, alimenti vaxtında və artıq ödəyən məsuliyyətli şəxslər də var:
"Aliment məsələləri ilə bağlı bunu xüsusi vurğulamaq lazımdır ki, söhbət heç də hər kəsə aid deyil. Cəmiyyətimizdə elə kişilər var ki, aliment ödənişlərini vaxtında və tam şəkildə edirlər. Hətta bəzi hallarda minimum məbləğdən artıq ödəyənlər də var. Məsələn, alimentin minimum məbləği 246 manat müəyyən edilibsə, bəzi şəxslər bunu 300 manat və ya daha çox ödəyirlər. Elələri də var ki, onlar alimentdən əlavə yardım göstərirlər".
Psixoloq qeyd edib ki, aliment ödənişlərində problemlər daha çox mübahisəli ailələrdə baş verir:
"Yenə də qeyd edirəm ki, bu deyilənlər ümumiləşdirilməməlidir. Amma düşünürəm ki, aliment ödənişlərinin gecikdirilməsi və ya yerinə yetirilməməsi əsasən mübahisəli ailələrdə daha çox müşahidə olunur. Belə ailələrdə bu məsələ sanki bir təzyiq və ya etiraz vasitəsinə çevrilir. Bu vəziyyət böhranla deyil, daha çox yaş amili ilə bağlıdır və boşanma hallarına nəzər salanda bunu aydın görmək olur.
Məsələn, 25 yaşında ayrılan insanlar üçün bu, müəyyən keçid və uyğunlaşma dövrü olur və əksər hallarda aliment ödənişləri həyata keçirilir. Amma müşahidələrimə əsasən, 40–45 yaş aralığında olan kişilər arasında alimentdən boyun qaçırma hallarına daha çox rast gəlinir. Yenə də vurğulayıram ki, bu, hamıya aid deyil. Sadəcə olaraq, bu yaş dövründə olan bəzi kişilər məsuliyyəti üzərindən atmağa və ya məsələyə etinasız yanaşmağa meylli olurlar".
Ekspert, həmçinin vurğulayıb ki, gənc kişilər alimenti daha məsuliyyətlə və vaxtında ödəyirlər:
"Əksinə, gənc ailələrdə, xüsusilə 25–30 yaş aralığında olan kişilər arasında alimenti vaxtında və hətta artıq məbləğdə ödəyənlərə daha çox rast gəlinir. Bu, şəxsi məsuliyyət və vicdan məsələsidir və hər kəs öz üzərinə düşən öhdəliyi dərk etməlidir".
Mütəxəssis bildirib ki, bəzən cəmiyyətdə belə bir yanlış fikir səslənir ki, guya boşanmalar yalnız aliment almaq üçün baş verir. Məncə, bu yanaşma düzgün deyil. Axı aliment uşağın ehtiyacları üçündür və uşaq ailədən ayrı düşdükdən sonra bu vəsaitin onun bütün ehtiyaclarını necə qarşılayacağını düşünmək lazımdır.
"Bir daha deyirəm, bu fikirlər hamıya şamil edilmir. Amma müşahidələr göstərir ki, alimentə laqeyd münasibət daha çox mübahisəli ailələrdə və xüsusilə 40–45 yaş aralığında olan bəzi kişilər arasında rast gəlinir. Gənc ailələrdə isə bu məsuliyyətə daha ciddi yanaşılır", - S.Həbibova fikrini tamamlayıb.
Jalə Rövşən
