Medinskinin cavabı gecikmədi: Kreml niyə narahatdır?

“Son vaxtlar Rusiya siyasətçiləri və deputatları, Kreml rəsmiləri bütövlükdə MBD məkanına, o cümlədən də Azərbaycana yönəlik bəzi təhdidkar açıqlamalar veriblər”.

Politoloq Elçin Xalidbəyli bunu TodayPress TV-yə açıqlamasında deyib.

O bildirib ki, qərəzli mövqedən çıxış etməklə yenidən Rusiyanın ermənipərəst və neoimperialist mövqeyini ön plana keçirirlər:

“Təbii ki, bunun kifayət qədər ciddi səbəbləri mövcuddur. Bu səbəblər sırasında Rusiyanın beynəlxalq məkanda mövqelərinin ciddi şəkildə zəifləməsi və dünya nəhəngləri ilə rəqabətdə geri qalması, çöküş prosesinin başlaması və s. kimi məsələlər Kremli həm narahat edir, həm də qıcıqlandırır. Bu səbəbdən Rusiyanı təmsil edən rəsmi şəxslərin açıqlamalarında aqressivlik, təhdidkarlıq ritorikası ön plana keçir. Ancaq Kremldə artıq bir şeyi anlamalıdırlar ki, zaman dəyişib, dünya inkişaf edir. Rusiya eyni narrativlər üzərindən dünyaya öz iradəsini diktə edə bilməz və Kreml bu reallıqla barışmalıdır”.

Ekspert düşünür ki, Kremli Azərbaycanla bağlı narahat edən əsas məsələlərdən biri Azərbaycanın artıq Rusiya üçün əlçatmaz dövlətlər sırasına qatılmasıdır:

“Artıq Kremldə tədricən anlamağa başlayıblar ki, Azərbaycana təzyiq göstərmək, onu yenidən Rusiyanın təsir dairəsinə qaytarmaq demək olar ki, mümkün deyil. Xüsusən də Azərbaycan Türkiyə ilə strateji müttəfiqlik barədə Şuşa Bəyannaməsinin imzalanmasından sonra Rusiya üçün ümumiyyətlə nəzarətdən kənar dövlətə çevrilib. Türkiyə NATO dövlətidir və NATO-nun avanqard dövlətləri sırasına daxildir. Buna paralel olaraq Azərbaycan NATO ilə də münasibətlərini inkişaf etdirir. Birgə təlimlər keçirilir, eyni zamanda müəyyən siyasi-hərbi əməkdaşlıq sahələri üzrə də münasibətlərin inkişaf etdirilməsi müşahidə olunur”.

Analitik, həmçinin Azərbaycanın Avropa dövlətləri ilə də yüksək səviyyəli münasibətlərini vurğulayıb:

“Azərbaycan artıq özünün hərbi, siyasi, həm də enerji təhlükəsizliyini tam təmin edib və Rusiya bu reallıqla heç cür barışmaq istəmir. Azərbaycanın Rusiyadan kənar müstəqil siyasətini qıcıqla qarşılayır və hətta müyyən mənada MDB məkanındakı Rusiyanın nüfuzuna ciddi təhlükə hesab edir. Azərbaycanın qlobal məkanda nüfuzunun yüksəlməsi və beynəlxalq səviyyədə siyasi iradə nümayiş etdirən dövlətə çevrilməsi Kremli ciddi narahat edir. Onun qəzəbinin arxasında bu cür geopolitik, geoiqtisadi və geostrateji faktorlar dayanır. Azərbaycanın bundan sonra Rusiyanın təsir dairəsində olma ehtimalı yoxdur”.

Qeyd edək ki, Rusiya Federasiyası Prezidentinin köməkçisi Vladimir Medinski 9 iyun tarixində “Russia Today” kanalına müsahibə verib. Medinski müsahibəsində Rusiyanın Ukraynanın işğal etdiyi ərazilərinin nə vaxtsa Qarabağ kimi azad olunacağından qorxduğunu bildirib.

Azərbaycan Xarici İşlər Nazirliyi Medinskinin açıqlamasına etiraz edib. Nazirliyin mətbuat katibi Ayxan Hacızadə bildirib:

“Rusiya Prezidentinin köməkçisi Rusiya-Ukrayna müharibəsini Qarabağda mövcud olmuş vəziyyətlə müqayisə edir. Azərbaycan heç zaman heç bir ölkənin ərazi bütövlüyünü pozmadığına görə və heç bir ölkəyə qarşı aqressiv müharibə aparmadığına görə belə müqayisə yersizdir”.

Qiymət Mahir