“İlham Əliyev üçün əsas məsələ regionun sabitliyidir” - Erməni jurnalist DANIŞDI
“Azərbaycan Prezidenti İlham Əliyev “Əl-Ərəbiyyə” telekanalına verdiyi müsahibəsində region üçün önəmli mesajlar səsləndirib. O vurğulayıb ki, Ermənistan ərazisindən keçməsi nəzərdə tutulan ikinci nəqliyyat dəhlizi təkcə Azərbaycan üçün deyil, İrəvanın özü üçün də ciddi iqtisadi imkanlar yarada bilər. Prezidentin fikrində belə bir məntiq dayanır: hər bir ölkə öz ərazisini tranzit qovşağına çevirə bilsə, bu, uzunmüddətli gəlirlər və davamlı inkişaf deməkdir”.
Erməni jurnalist Natali Aleksanyan bunu TodayPress TV-yə açıqlamasında deyib.
O, Prezident İlham Əliyevin bu yanaşmasını realist və səxavətli adlandırıb:
“Azərbaycan Prezidenti qarşılıqlı faydalı əməkdaşlığın mümkünlüyünü nümayiş etdirməyə çalışır. Əgər Ermənistan tranzit ölkəyə çevrilə bilsə, bu, daxili iqtisadi fəallığın artmasına və yeni beynəlxalq tərəfdaşlıqların qurulmasına təkan verə bilər”.
Jurnalist, eyni zamanda, Ermənistan tərəfinin bu məsələdə bir şərtə xüsusi önəm verdiyini də xatırladıb:
“İrəvan dəfələrlə bəyan edib ki, kommunikasiyaların açılması yalnız Ermənistanın suveren nəzarəti altında həyata keçirildiyi halda mümkündür. Bu, bizim üçün prinsipial məsələdir. Çünki regional sabitlik dövlətlərin müstəqilliyinə və sərhədlərinə hörmət əsasında formalaşmalıdır.
Bu məqamda, İlham Əliyevin açıqlamaları onun regionun gələcəyinə dair açıq və strateji baxışını ortaya qoyur. Burada məqsəd regionu nəqliyyat və iqtisadi inteqrasiya vasitəsilə daha birləşmiş və inkişaf etmiş bir məkana çevirməkdir. Əgər tərəflər qarşılıqlı qəbul edilə bilən razılıq nöqtələri tapa bilsələr, bu yalnız Ermənistan və Azərbaycan üçün deyil, bütövlükdə Cənubi Qafqaz üçün faydalı olacaq”.
N.Aleksanyan həm Azərbaycan Prezidenti İlham Əliyevə, həm də Ermənistanın Baş naziri Nikol Paşinyana hörmətlə yanaşdığını ifadə edib və dialoq yolu ilə məntiqli sonluğa çatılacağına ümid etdiyini vurğulayıb:
“Ermənistan müxalifətinin irəli sürdüyü bəzi narrativlər isə sadəcə təbəssüm doğurur. Çünki Azərbaycanın lideri üçün əsas məsələ bölgədə davamlı sabitliyin təmin olunmasıdır”.
Qeyd edək ki, Azərbaycan Prezidenti İlham Əliyev “Əl-Ərəbiyyə” telekanalına müsahibəsində ikinci dəhlizin Ermənistan ərazisindən keçəcəyini bildirib:
"Bu isə Ermənistan üçün faydalıdır. Mən bu mesajı erməni həmkarlarıma çatdırmağa çalışmışam ki, nəticədə onlar tranzit ölkəyə çevriləcəklər. Potensialı varsa, hər bir ölkə tranzit ölkəyə çevrilməyə çalışır. Məsələn, biz tranzit ölkə olmaq istəyirik. İstəyirik ki, Şərqdən Qərbə, Şimaldan Cənuba dəhlizlər Azərbaycandan keçsin. Ermənistan isə işğal səbəbindən bu imkanlardan məhrum olmuşdu. Ölkədən keçən tranzit yoxdur. Zəngəzur dəhlizi sayəsində Ermənistan nəqliyyatdan tranzit haqqı əldə edəcək".
Qiymət Mahir
