Taxıl zəmilərindən 900 min tondan artıq məhsul yığılıb
Bu günə qədər Azərbaycanda taxıl zəmilərindən 904 min ton məhsul yığılıb.
TodayPress TV bu barədə Kənd Təsərrüfatı Nazirliyinə istinadən xəbər verir.
Qurumda biçinin mütəşəkkil təşkilinə dair yaradılmış Operativ Qərargahın məlumatına görə, ölkə üzrə taxıl sahələrinin 30 %-də biçin prosesi başa çatıb. Buğda sahələrinin 8,6 %-i, arpa sahələrinin isə 55,3 %-i biçilib. Buğda üzrə orta məhsuldarlıq 34,7 sent/ha, arpa üzrə orta məhsuldarlıq isə 32 sent/ha təşkil edir. Taxıl üzrə orta məhsuldarlıq göstəricisi ötən ilin müvafiq dövrü ilə müqayisədə 2,2 sent/ha çoxdur.
Hazırda respublikanın 50 rayonunda aktiv biçin prosesi gedir. Biçinə 1 534 kombayn cəlb olunub. Kombaynlardan 585-i “Aqroservis” ASC-nin, 949-u isə fiziki və hüquqi şəxslərə məxsus texnikalardır.
Artıq Ağdam, Bərdə, Füzuli, Cəlilabad, Lənkəran, Neftçala, Saatlı, Sabirabad, Salyan və Yevlax rayonlarında arpa biçini tam yekunlaşmaq üzrədir. Bu rayonlar üzrə arpa sahələrinin 90 %-dən çoxunda biçin başa çatıb. Bir çox rayonlarda isə arpa biçini ilə paralel buğda biçininə də start verilib. Hazırda ən çox buğda biçini Yevlax (86 %) və Masallı (33 %) rayonlarında aparılıb.
Biçin prosesi növbəlilik prinsipi əsasında aparılır. Prosesin başlamadığı rayonlarda olan kombaynlar əvvəlcədən tələbata uyğun olaraq hazırlanmış dislokasiya planı əsasında aktiv biçin bölgələrinə göndərilir. Bu mexanizm kombayna olan tələbatın ödənilməsini, məhsulun vaxtında və itkisiz yığımını təmin edir.
Respublikada gələn həftədən başlayaraq buğda sahələrində kütləvi biçinə start veriləcək. Ümumilikdə biçin prosesinin optimal müddətdə başa çatdırılması proqnozlaşdırılır.
